ინფორმაციას სპეციალური საგამოძიებო სამსახური ავრცელებს.

რატომ არის მნიშვნელოვანი: უწყების ცნობით, ბრალდებულებმა უკანონოდ მოიპოვეს, გამოიყენეს და გაავრცელეს დაზარალებულების ინტიმური ხასიათის ფოტოები და სქესობრივი აქტის ამსახველი ვიდეოჩანაწერები.

  • საგამოძიებოს განცხადებით, 1977 წელს დაბადებული კაცი 2022 წლის მაისში, სოციალური ქსელის მეშვეობით, არასრულწლოვანს სექსუალური ცხოვრების დეტალებზე ესაუბრებოდა, უგზავნიდა სექსუალური აქტის და სხვა ინტიმური შინაარსის ამსახველ ვიდეოებს, ასევე, თავადაც სთხოვდა მსგავსი ფოტოებისა და ვიდეოების გადაღებას.
  • მოპოვებული და უნებართვოდ შენახული არასრულწლოვანის ინტიმური ხასიათის ვიდეოჩანაწერები კი მან უკანონოდ გაავრცელა, კერძოდ, გადაუგზავნა არასრულწლოვანი დაზარალებულის თანაკლასელს.

დეტალები: ასევე, 1978 და 1986 წელს დაბადებულმა პირებმა უკანონოდ მოიპოვეს და შეინახეს სხვა პირის შიშველი სხეულის ამსახველი ფოტოები, რომლებიც შანტაჟის მიზნით გაავრცელეს, კერძოდ, გადაუგზავნეს დაზარალებულის ოჯახის წევრს.

  • გამოძიებით დადგინდა, რომ 1993 წელს დაბადებულმა პირმა თბილისში, 2022 წლის სექტემბერში უკანონოდ მოიპოვა და უნებართვოდ ინახავდა დაზარალებულის ინტიმური ხასიათის ვიდეოჩანაწერს.
  • ამ ვიდეოების გასაჯაროების მუქარით კი დაზარალებულს თანხას სისტემატურად ართმევდა, რითაც ხელყო მისი პირადი ცხოვრების საიდუმლო და მიაყენა მატერიალური ზიანი.

საგამოძიებო სამსახურმა, ასევე, ამხილა 3 პირი, რომლებიც სხვადასხვა დროს თბილისსა და სამეგრელოში დაზარალებულებთან უკანონოდ იღებდნენ სქესობრივი აქტის ამსახველ ვიდეოებსა და ინტიმური შინაარსის ფოტოებს, რომლებსაც მობილურ ტელეფონებში უკანონოდ ინახავდნენ.

  • ასევე, მათი გავრცელების მუქარით, დაზარალებულებს ინტიმური ხასიათის ახალი ფოტოების გადაღებას და გადაგზავნას აიძულებდნენ.

დანაშაულში მხილებულ 6 პირს პროკურატურამ ბრალდება სსკ-ის 157-ე პრიმა მუხლის პირველი ნაწილით, ხოლო 1 პირს სსკ-ის 157-ე პრიმა მუხლის პირველი ნაწილით და 141-ე მუხლით წარუდგინა.

  • დანაშაული 4-დან 7 წლამდე თავისუფლების აღკვეთას ითვალისწინებს.