ამის შესახებ ოკუპანტი ქვეყნის საგარეო საქმეთა მინისტრის მოადგილემ, მიხაილ გალუზინმა რუსულ სამთავრობო, პროპაგანდისტულ მედიასთან ისაუბრა.

რატომ არის მნიშვნელოვანი: რუსეთთან უვიზო რეჟიმი 2008 წლის აგვისტოს ომის შემდეგ გაუქმდა, პირდაპირი ფრენები კი 2019 წლის 20 ივნისის შემდეგ აიკრძალა.

• 2012 წელს საქართველომ რუსეთთან სავიზო რეჟიმი ცალმხრივად გაუუქმა, რაც იმას ნიშნავს, რომ რუსეთის მოქალაქეებს საქართველოში შემოსასვლელად ვიზა არ სჭირდებათ.
• უკრაინის წინააღმდეგ ომის დაწყების შემდეგ საქართველოში რუსეთის მოქალაქეების რიცხვი გაიზარდა. ნაწილმა აქ უძრავი ქონებაც შეიძინა და ბიზნესებიც დაირეგისტრირა.
• მაშინ, როცა მთელი მსოფლიოს ცივილიზებული ნაწილი რუსეთს სანქციებს უწესებს და იზოლაციაში აქცევს, ჩვენთან თანამშრომლობის განვითარებაზე საუბრობენ.

დეტალები: გალუზინი დარწმუნებულია, რომ რუსეთ-საქართველოს შორის სტაბილური კავშირების არსებობა ქართველების ინტერესებშიცაა.

• ამის მიზეზად კი რუსული პროპაგანდის ტრადიციული არგუმენტები მოჰყავს: "მეგობრობის უძველესი ტრადიციები, კეთილმეზობლობა, საერთო ისტორია, კულტურა და სულიერი ფასეულობები გვაერთიანებს".
• ოკუპანტი ქვეყნის საგარეო უწყების წარმომადგენელი საქართველოსთან ურთიერთობით კმაყოფილია და ამბობს, რომ ორ ქვეყანას შორის თანამშრომლობა ვითარდება.
• "მიმდინარე წლის 11 თვეში სავაჭრო ბრუნვა 2021 წლის ანალოგიურ პერიოდთან შედარებით ერთნახევარჯერ გაიზარდა და 2, 2 მილიარდ დოლარს გადააჭარბა. ვაჭრობის პარალელურად, მაჩვენებლები იზრდება ტურიზმისა და ფულადი გზავნილების მიმართულებით", — თქვა მან.
• თუ ასე გაგრძელდება, მინისტრის მოადგილე საქართველოსთან უვიზო რეჟიმის გაუქმებასაც არ გამორიცხავს.
• "რაც შეეხება საქართველოს მოქალაქეების რუსეთში მოგზაურობისთვის სავიზო რეჟიმის გაუქმების პერსპექტივებს, არ გამოვრიცხავთ პოზიტიური გადაწყვეტილებების მიღებას, როგორც კი ამის აუცილებელი წინაპირობა ჩამოყალიბდება".

არქივიდან: ქართულ ოცნებაში ამბობენ, რომ რუსეთთან პირდაპირი ფრენების აღდგენაში პრობლემას ვერ ხედავენ.

• 17 ოქტომბერს, ფინანსთა მინისტრმა, ლაშა ხუციშვილმა განაცხადა, რომ რუსეთთან სავიზო რეჟიმის საჭიროებას ამ ეტაპზე ვერ ხედავს.
• მინისტრი ამ განცხადებით, პრეზიდენტ ზურაბიშვილს გამოეხმაურა, რომელმაც თქვა, რომ რუსეთთან სავიზო რეჟიმი საკმაოდ ლიბერალურია და არ არის გამორიცხული, მისი გადახედვა მოგვიწიოს.

• ეკონომიკის მინისტრი, ლევან დავითაშვილი კი ამბობს, რომ საქართველოს მთავრობას რუსეთთან პირდაპირი ფრენების აღდგენასთან დაკავშირებით, ოფიციალური მომართვა ამ ეტაპზე არ აქვს, თუმცა უცნობია, რა პოზიცია ექნება ასეთ შემთხვევაში სახელმწიფოს.

ფართო კონტექსტში: რუსეთთან სავიზო რეჟიმის გაუქმების, ფრენების აღდგენისა და ურთიერთობის ნორმალიზების მომხრეები ხშირად აპელირებენ, რომ საქართველო რუსეთის ეკონომიკაზეა დამოკიდებული და სხვაგვარად ვერ გადავრჩებით, თუმცა ასე არ არის.

• ამავდროულად, ევროკავშირი რუსეთის მოქალაქეებს ვიზების მიღებას ურთულებს.
• CNN-ის ცნობით, ევროკავშირის მინისტრებმა მიაღწიეს კონსენსუსს, რომ სრულად შეაჩერონ რუსეთთან სავიზო რეჟიმის გამარტივების შესახებ შეთანხმება.
• ევროკავშირის უმაღლესი წარმომადგენლის, ჯოზეფ ბორელის განცხადებით კი, ეს გადაწყვეტილება ევროკავშირის წევრი ქვეყნების მიერ გაცემული ახალი ვიზების რაოდენობას საგრძნობლად შეამცირებს.
• საქართველოს მოქალაქეები რუსეთთან სავიზო რეჟიმის დაწესებას, საჰაერო სივრცის დაკეტვასა და რუსული მედიის აკრძალვას დიდი ხანია, ითხოვენ.