ამის შესახებ პეტერბურგის, სმოლნინსკოეს მუნიციპალიტეტის საკრებულოს ოპოზიციონერმა დეპუტატმა, ნიკიტა იუფერევმა ტვიტერზე დაწერა.

რატომ არის მნიშვნელოვანი: პუტინის ხელისუფლება უკრაინის წინააღმდეგ დაწყებულ სრულმასშტაბიან ომს სპეციალურ სამხედრო ოპერაციას უწოდებს.

  • ოკუპანტ ქვეყანაში მოქმედებს კანონი ("რუსეთის ფედერაციის შეიარაღებული ძალების გამოყენების შესახებ სანდო შეტყობინებების საფარქვეშ შეგნებულად ყალბი ინფორმაციის საჯარო გავრცელება"), რომელიც სპეცოპერაციის ომად მოხსენიებას კრძალავს.
  • რუსეთის არმიის წინააღმდეგ "ყალბი ცნობების" გავრცელების ბრალდებით ქვეყანაში არაერთი პირია დაკავებული, რომელთაც 15 წლამდე პატიმრობა ემუქრებათ.
  • ამავე მუხლით, ბუჩადან გავრცელებული კადრების გამო ოპოზიციონერ პოლიტიკოსს, ილია იაშინს 8 წლითა და 6 თვით პატიმრობა მიესაჯა.

დეტალები: იუფერევის თქმით, პუტინმა თავისი განცხადებით სწორედ რუსეთის ჯარის შესახებ კანონი დაარღვია.

  • იგი სამართალდამცავ უწყებებს სთხოვს, გადაამოწმონ რუსეთის პრეზიდენტის 21 დეკემბრის მიმართვა, რომელშიც პუტინი ამბობს ფრაზას: "ჩვენი მიზანი არ არის სამხედრო კონფლიქტის გაღვივება, პირიქით, ჩვენი მიზანია, დავასრულოთ ეს ომი".
  • "რამდენიმე ათასი ადამიანი უკვე გაასამართლეს ომზე ასეთი სიტყვებისთვის. მივმართე ორგანოებს, რათა პუტინი ჯარის შესახებ ფეიკების გავრცელების გამო პასუხისგებაში მიეცეს", — წერს ოპოზიციონერი დეპუტატი.