თბილისის საქალაქო სასამართლო სააკაშვილის სასჯელის გადავადებაზე ან მისგან სრულად გათავისუფლებაზე მსჯელობს.

რატომ არის მნიშვნელოვანი: სააკაშვილის ოჯახის წევრები, ექიმები და ადვოკატები ექსპრეზიდენტის ჯანმრთელობის მდგომარეობის მკვეთრ გაუარესებაზე საუბრობენ და საზღვარგარეთ მის სამკურნალოდ გადაყვანას ითხოვენ.

• ყოფილი პრეზიდენტის ჯანმრთელობის მდგომარეობაზე ცენტრ ემპათიის დასკვნაში ნათქვამია, რომ "მოსალოდნელია კომა და სიკვდილი".
• სწორედ ჯანმრთელობის გაუარესების გამო სააკაშვილის სასამართლო პროცესი რამდენჯერმე გადაიდო.
• 14 დეკემბერს პენიტენციურმა სამსახურმა ყოფილი პრეზიდენტი საკუთარ სასამართლო პროცესზე დისტანციურად არ ჩართო და მიზეზად "შესაბამისი ტექნიკური მოწყობილობების" არარსებობა დაასახელა.
• სამაგიეროდ, იმავე დღეს უწყებამ გაასაჯაროვა დამონტაჟებული, უხმოდ და უკონტექსტოდ შეკრული კადრები, რომლებიც კლინიკა ვივამედში, მიხეილ სააკაშვილის პალატაშია გადაღებული.
• პოსტის აღწერაში პენიტენციურმა დაწერა, რომ "ვიდეომასალაში ნათლად ჩანს მიხეილ სააკაშვილის სიმულაციური ქმედებები, რომლის მიზანია მართლმსაჯულების განხორციელებისთვის ხელის შეშლა".

დეტალები: ადვოკატმა, შალვა ხაჭაპურიძემ სააკაშვილს მიმართა, წამომდგარიყო, აეწია პერანგი და საზოგადოებისთვის ეჩვენებინა, რა მდგომარეობაში იმყოფება.

• "ეს არის, დაახლოებით, აზოვის ბატალიონის ბიჭები რომ გამოუშვეს, იგივე მდგომარეობა", — თქვა მან.
• საპასუხოდ, მოსამართლემ განაცხადა, რომ თუ ყოფილი პრეზიდენტი "გაშიშვლებას დაიწყებდა", სხდომიდან გამორთავდა.
• ამის შემდეგ სააკაშვილმა სცადა, სასამართლოსთვის უკრაინულად მიემართა, თუმცა მოსამართლემ მას არც ამის უფლება მისცა.
• "ბატონო მიხეილ, ხართ უკრაინის მოქალაქე, შეიძლება, მაგრამ ფლობთ ქართულ ენას, სამართალწარმოება მიდის ქართულად, შესაბამისად, ქართულად უნდა მოგვმართოთ და გვითხრათ. მე არ ვიცი უკრაინული ენა", — განაცხადა მოსამართლემ, გიორგი არევაძემ.

მიხეილ სააკაშვილი თბილისში 1 ოქტომბერს დააკავეს.

• 20 ოქტომბერს, პროკურატურაში გამართულ ბრიფინგზე ცნობილი გახდა, რომ სააკაშვილმა სახელმწიფო საზღვარი უკანონოდ 29 სექტემბერს, რძის პროდუქტებით დატვირთული ტრაილერით გადმოკვეთა.
• სამართალდამცავმა უწყებამ მას ბრალი სისხლის სამართლის კოდექსის 344-ე მუხლის პირველი ნაწილით წარუდგინა, რაც საქართველოს სახელმწიფო საზღვრის უკანონოდ კვეთას გულისხმობს და ჯარიმით ან 3-დან 5 წლამდე პატიმრობით ისჯება.
• უზენაესი სასამართლოს მიერ სააკაშვილი დამნაშავედ არის ცნობილი ბიზნესმენ ვალერი გელაშვილის ცემისა და სანდრო გირგვლიანის მკვლელობაში ბრალდებულ პირთა შეწყალების საქმეებზე.
• ასევე — 7 ნოემბრის აქციის დარბევისა და იმედში შეჭრის, პატარკაციშვილების ქონების უკანონოდ დაუფლებისა და სახელმწიფო დაცვის სპეციალური სამსახურის კუთვნილი 9 024 367 ლარის გაფლანგვის საქმეებზე.

არქივიდან: სააკაშვილმა დაპატიმრების შემდეგ შიმშილობა ორჯერ გამოაცხადა. პირველი, 50-დღიანი შიმშილობა მან 19 ნოემბერს, გორის სამხედრო ჰოსპიტალში გადაყვანის შემდეგ შეწყვიტა.

• მეორედ ექსპრეზიდენტმა შიმშილობა 21 თებერვალს დაიწყო, მე-20 დღეს კი შეწყვეტის მიზეზად უკრაინის მთავარსარდლობის თხოვნა დაასახელა.