ჟურნალისტთა ქსელი გენდერული თანასწორობისათვის ორგანიზებით, თემის ლიდერი, ფერმერი, ექიმი, მასწავლებელი, სამართალდამცავი, სახელმწიფო და არასახელმწიფო ორგანოების, პოლიტპარტიების, მედიის წარმომადგენელი კაცები შეიკრიბებიან და იმსჯელებენ ქალთა პოლიტიკური მონაწილეობის მნიშვნელობაზე.

კამპანია მიზნად ისახავს კაცებმა მოახდინონ ქალთა პოლიტიკაში მონაწილეობის იდეის პოპულარიზაცია და მხარი დაუჭირონ ქალ კანდიდატებს.

პირველი დისკუსია 6 ივნისს, 15:00 საათზე, გორში, ტელეკომპანია თრიალეთის ოფისში მოქმედ გენდერის მედია ცენტრში გაიმართება.

დისკუსიას გახსნიან საარჩევნო სისტემების საერთაშორისო ფონდის (IFES) დირექტორი ჯერომ ლეღო და ჟურნალისტთა ქსელის კოორდინატორი ინგა ალავიძე. დისკუსიას წარუძღვებიან გორის გენდერის მედია ცენტრის დირექტორი ნათია ომაძე; გორის დემოკრატიის სკოლის დირექტორი ზაზა ჭიპაშვილი და რადიო თავისუფლების ჟურნალისტი გოგა აფციაური, რომლებიც ისაუბრებენ მამაკაცების როლზე ქალთა პოლიტიკაში მონაწილეობის მნიშვნელობის შესახებ.

კამპანია იმართება პროექტის "თანასწორობა იგებს" ფარგლებში, რომელსაც ახორციელებს "ჟურნალისტთა ქსელი გენდერული თანასწორობისათვის აშშ საერთაშორისო განვითარების სააგენტოს (USAID) და საარჩევნო სისტემების საერთაშორისო ფონდის (IFES) მხარდაჭერით.