დემირელის კოლეჯის ხარისხის მართვის მენეჯერის, მუსტაფა ემრე ჩაბუქის ცოლი, თუბა ჩაბუქი საქართველოში ევროკავშირის წარმომადგენლობაში მივიდა, რათა ინფორმაცია მიაწოდოს ელჩს, იანოშ ჰერმანს.

საელჩოში მისვლის მიზეზზე თუბა ჩაბუკი On.ge-ს ესაუბრა:

"ჩვენ აქ მოვედით იმისათვის, რომ ევროკავშირის წარმომადგენლობას ვესაუბროთ ჩვენი პრობლემების შესახებ. ვესაუბროთ იმის შესახებ, თუ რა ხდება თურქეთში.

როგორც მოგეხსენებათ, ჩემი მეუღლე 15 წელია საქართველოში ცხოვრობს და საგანმანათლებლო საქმიანობას ეწევა. ამჟამად იგი სრულიად უსაფუძვლოდაა დაკავებული და ბრალდება ტერორისტული ორგანიზაციის წევრობა. მისი ექსტრადიციის შემთხვევაში მისი სიცოცხლე იქნება საფრთხის ქვეშ, რადგან ცნობილია, რომ თურქეთში პატიმრებისადმი არასათანადო მოპყრობას აქვს ადგილი.

ვთხოვთ ევროკავშირის წარმომადგენლობას დაგვეხმაროს, რომ არ მოხდეს მისი ექსტრადიცია".

მუსტაფა ემრე ჩაბუქი თურქეთის მხარის მოთხოვნით საქართველოში 24 მაისს დააკავეს. ადვოკატის თქმით, ბრალდების თანახმად, მუსტაფა ემრე თითქოს ეხმარებოდა ერთ-ერთ ტერორისტულ ორგანიზაციას და ეს ორგანიზაცია მოხსენიებულია, როგორც "ფეთულა გიულენის მიმდევრები". კერძოდ, ადვოკატის თქმით, ბრალდების მასალებში აღნიშნულია, რომ მუსტაფა ემრე ჩაბუქს ბრალად ედება, თითქოს, ის ეხმარებოდა დემირელის კოლეჯის ერთ-ერთ პარტნიორს, რათა 2017 წელს გაესხვისებინა წილი ერთ-ერთ ამერიკულ კომპანიაზე.

მუსტაფა ემრე ჩაბუქს თბილისის საქალაქო სასამართლომ წინასაექსტრადიციო სამთვიანი პატიმრობა შეუფარდა. მოსამართლემ პროკურატურის შუამდგომლობა დააკმაყოფილა. ხელისუფლებას ჩაბუქის გათავისუფლებისკენ და თურქეთისთვის არგადაცემისკენ მოუწოდა რვა არასამთავრობო ორგანიზაციამ.