ერთიანი ნაციონალური მოძრაობის წევრმა ამის შესახებ პარლამენტში განაცხადა.

რატომ არის მნიშვნელოვანი: 14 დეკემბერს, მას შემდეგ, რაც ექსპრეზიდენტი საკუთარ სასამართლო პროცესზე არ ჩართეს და მიზეზად ტექნიკური პირობების არარსებობა დაასახელეს, პენიტენციურმა სამსახურმა დამონტაჟებული კადრები გაასაჯაროვა, რომელიც კლინიკა ვივამედში, მიხეილ სააკაშვილის პალატაშია გადაღებული.

  • კადრები აგვისტოდან დეკემბრის ჩათვლით თარიღდება და უხმოდ და უკონტექსტოდ არის შეკრული. 10-წუთიანი ვიდეოდან ბოლო პერიოდის კადრებს, რომლებიც სააკაშვილის ახლანდელ მდგომარეობას ასახავს, ყველაზე ნაკლები დრო, 19 წამი ეთმობა. ნაწილზე კი თარიღი საერთოდ არ ჩანს.
  • ვიდეომასალის გამოქვეყნებას წინ უძღოდა იუსტიციის მინისტრის, რატი ბრეგაძის მუქარა, რომ, თუ "სიმულაციური ქმედებები" არ შეწყდებოდა, გაასაჯაროებდნენ მტკიცებულებებს.
  • გუშინ შიმშილობა ერთიანი ნაციონალური მოძრაობის სამმა წევრმა დავით კირკიტაძემ, ანი წითლიძემ და აბდულ ისმაილოვმა დაიწყეს.

დეტალები: თემურ ჯანაშია ამბობს, რომ უერთდება თავის კოლეგებს შიმშილობის დაწყებაში, რათა გადაარჩინონ ყოფილი პრეზიდენტის, მიხეილ სააკაშვილის ჯანმრთელობა.

  • "თუ მივიღებთ გარანტიას, რომ ეს ადამიანი არის ისეთი კვალიფიციური ექიმების ხელში, ისეთ მდგომარეობაში, რომ პროგრესი აღინიშნება, მისი ჯანმრთელობის რეალური პროგრესი, მაგ შემთხვევაში, რა თქმა უნდა, შევწყვეტთ შიმშილობას", — განაცხადა თემურ ჯანაშიამ.