სააკაშვილის წერილს გიორგი ცალაძე ავრცელებს.

რატომ არის მნიშვნელოვანი: ბოლო პერიოდია, სააკაშვილის ოჯახის წევრები, ექიმები და ადვოკატები ექსპრეზიდენტის ჯანმრთელობის მდგომარეობის მკვეთრ გაუარესებაზე საუბრობენ და საზღვარგარეთ მის სამკურნალოდ გადაყვანას ითხოვენ.

• ყოფილი პრეზიდენტის ჯანმრთელობის მდგომარეობაზე ცენტრ ემპათიის დასკვნაში ნათქვამია, რომ "მოსალოდნელია კომა და სიკვდილი".
• სწორედ ჯანმრთელობის გაუარესების გამო სააკაშვილის სასამართლო პროცესი რამდენჯერმე გადაიდო.
• 9 დეკემბერს, სასამართლო სხდომის გადადებამდე მოსამართლე და ადვოკატები შეთანხმდნენ, რომ ყოფილი პრეზიდენტი დღევანდელ პროცესს დისტანციურად დაესწრებოდა.
• თუმცა პროცესზე, სადაც სააკაშვილის სასჯელის გადავადებაზე ან მისგან სრულად გათავისუფლებაზე უნდა ემსჯელათ, ექსპრეზიდენტი ისევ არ ჩართეს. პენიტენციურმა სამსახურმა მიზეზად ტექნიკური მოწყობილობების არარსებობა დაასახელა.
• სწორედ ამის შემდეგ გამოაცხადა სააკაშვილმა შიმშილობა.

დეტალები: სააკაშვილის თქმით, ევროპარლამენტარებისგან მიიღო გზავნილი და ისინი სთხოვენ ამ ეტაპზე შევწყვიტო შიმშილობა, რათა საბაბი არ მისცეს შესაბამის სამსახურებს, თითქოს თავად იყენებს ზიანს.

• "ამავე დროს, ევროპარლამენტარები მპირდებიან მთელი დიპლომატიური მცდელობების მობილიზებას, რათა უზრუნველყონ ჩემი მინიმალური უფლებების დაცვა";
• "მე ცუდად ვარ იმიტომ კი არა, რომ ძალით არ ვჭამდი, არამედ იმიტომ, რომ მოწამლული ვარ, რაც აისახა კიდეც ევროპარლამენტარების განხილვაში, იმიტომ რომ არასათანადო მოპყრობის მსხვერპლი ვიყავი მრავალი თვის განმავლობაში, რაც მსოფლიოს საუკეთესო ექსპერტების, მათ შორის ნობელის პრემიის ლაურეატების დადასტურებულია", — წერს სააკაშვილი.

არქივიდან: უზენაესი სასამართლოს მიერ სააკაშვილი დამნაშავედ არის ცნობილი ბიზნესმენ ვალერი გელაშვილის ცემისა და სანდრო გირგვლიანის მკვლელობაში ბრალდებულ პირთა შეწყალების საქმეებზე.

• ასევე, 7 ნოემბრის აქციის დარბევისა და იმედში შეჭრის, პატარკაციშვილების ქონების უკანონოდ დაუფლებისა და სახელმწიფო დაცვის სპეციალური სამსახურის კუთვნილი 9 024 367 ლარის გაფლანგვის საქმეებზე.
• ამ საქმეებზე განაჩენი რამდენიმე წლის წინ გამოიტანეს, თუმცა ექსპრეზიდენტი საქართველოში არ იყო, შესაბამისად, სასჯელის მოხდა მას შემდეგ დაიწყო, რაც ქვეყანაში დაბრუნდა და 2021წლის პირველ ოქტომბერს დააპატიმრეს.
• სამართალდამცავმა უწყებამ მას დამატებით ბრალი სისხლის სამართლის კოდექსის 344-ე მუხლის პირველი ნაწილით წარუდგინა, რაც საქართველოს სახელმწიფო საზღვრის უკანონოდ კვეთას გულისხმობს და 3-დან 5 წლამდე პატიმრობით ისჯება.
• ექსპრეზიდენტმა დაპატიმრების შემდეგ შიმშილობა ორჯერ გამოაცხადა — პირველი, 50-დღიანი შიმშილობა მან 19 ნოემბერს, გორის სამხედრო ჰოსპიტალში გადაყვანის შემდეგ შეწყვიტა.
• მეორედ ექსპრეზიდენტმა შიმშილობა 21 თებერვალს დაიწყო, მე-20 დღეს კი შეწყვეტის მიზეზად უკრაინის მთავარსარდლობის თხოვნა დაასახელა.
• ექიმები ამბბოენ, რომ შიმშილობამ ექსპრზიდენტის ჯანმრთელობა დააზიანა.