ირანში საჯაროდ ჩამოახრჩვეს 23 წლის მაჯიდრეზა რაჰნავარდი, რომელიც ანტისამთავრობო გამოსვლების დროს დააკავეს. სასამართლომ მაჯიდრეზა გაასამართლა და "ღმერთის წინააღმდეგ მტრობაში" დასდო ბრალი, რადგან მათი ცნობით, 23 წლის ახალგაზრდამ სამხედრო დაჯგუფება ბასიჯის 2 წევრი დანით დაჭრა.

ირანში ანტისამთავრობო გამოსვლების დროს დაკავებული დემონსტრანტების სიკვდილით დასჯის პროცესი ცოტა ხნის წინ დაიწყო. ირანმა ანტისამთავრობო საპროტესტო აქციის მონაწილე სიკვდილით პირველად 8 დეკემბერს დასაჯა.

მოჰსენ შეკარი 8 დეკემბერს ჩამოახრჩვეს მას შემდეგ, რაც ირანის სასამართლომ "ღმერთის წინააღმდეგ მტრობაში" ის დამნაშავედ ცნო. დემონსტრანტს ბრალი დასდეს იმაში, რომ ის "მეამბოხე" იყო, რომელმაც 25 სექტემბერს თეირანის მთავარი გზა გადაკეტა და სამხედრო დაჯგუფება ბასიჯის წევრი დანით დაჭრა.

შეგახსენებთ, რომ 22 წლის ირანელი ქალის, მაჰსა ამინის გარდაცვალებას ქვეყანაში, შემდეგ კი მსოფლიოში საპროტესტო აქციები მოჰყვა. მაჰსა ამინი ე.წ. მორალის პოლიციამ "ჰიჯაბის ტარების წესის დარღვევისთვის" 13 სექტემბერს დააპატიმრა. თვითმხილველების თქმით, პოლიციის მანქანაში ჩასმის შემდეგ მაჰსას ფიზიკურად გაუსწორდნენ, მოგვიანებით კი ქალი გარდაიცვალა.

სწორედ ამ ფაქტის შემდეგ ირანში საპროტესტო აქციები დაიწყო. აქციაზე ირანელმა ქალებმა ჰიჯაბები დაწვეს და 22 წლის ქალის გარდაცვალება ამ ფორმითაც გააპროტესტეს. საპროტესტო ტალღას მსოფლიოს არაერთი ქვეყანა შეუერთდა.