პარტია პრემიერმინისტრის განცხადებას, სამხედრო სავალდებულო სამსახურში ცვლილების შესახებ, ფეისბუქზე გამოეხმაურა.

რატომ არის მნიშვნელოვანი: ღარიბაშვილმა მთავრობის სხდომაზე თქვა, რომ გირჩის მიერ შექმნილი რელიგიური ორგანიზაცია გაუქმდება.

  • "აღმოიფხვრება ეს საკანონმდებლო ხარვეზი, რომელიც მანამდე ბატონმა ზურაბ ჯაფარიძემ, დიდი პატივია ამ მთავრობის სხდომაზე მისი გვარის ხსენება, მაგრამ ვიტყვი, რომ ეს იყო ყველაზე დიდი მავნებლობა, რომელიც მან ჩაიდინა ქვეყნის ახალგაზრდობის და ჩვენი მომავალი თაობის წინააღმდეგ," — თქვა ღარიბაშვილმა.

დეტალები: პარტიის განცხადებით, სავალდებულო სამხედრო სამსახური არის მოძველებული, უკიდურესად არაეფექტური და ძვირი სისტემა, რომელსაც არაფერი აქვს საერთო ქვეყნის თავდაცვასა და უსაფრთხოებასთან.

  • "სწორედ ამ მიზეზების გამო, უკრაინამ, რომელიც ამჟამად ეფექტურად იბრძვის რუსეთის დედააფეთქებული იმპერიის წინააღმდეგ, ომის პირობებში გააუქმა სავალდებულო სამხედრო სამსახური", — ნათქვამია განცხადებაში.
  • გირჩი — მეტი თავისუფლების განმარტებით, სამხედრო სამსახურის ეფექტურობის გაზრდაზე საუბარი დეფაქტო ხელისუფლებისგან, რომელსაც ეშინია ქვეყნის 20%-ის მიმტაცებელს დაუძახოს მტერი, რომელიც უკრაინაში მებრძოლებს ემუქრება მოქალაქეობის ჩამორთმევით, არის უკიდურესი ცინიზმი და თავხედობა.
  • პარტიის თქმით, ერთადერთი ვისაც მთელი ეს წლები ყელში ეჩხირებოდა კანონმდებლობაში სპეციალურად მისთვის გაწერილი პრივილეგიის სხვა კონფესიის მიერ გამოყენება, არის საქართველოს მართლმადიდებლური ეკლესიის საპატრიარქო.
  • "რომელიც წარმოადგენს რუსეთის რეზიდენტურის მთავარ ცენტრს ამ ქვეყანაში და რომლის ინტერესებშიცაა საქართველომ შეინარჩუნოს ეს არქაული და ძვირადღირებული სისტემა, რათა მაქსიმალურად დროში გაიწელოს ეფექტური თავდაცვის სისტემის მშენებლობის დაწყება", — წერს გირჩი — მეტი თავისუფლება.

გირჩი — მეტი თავისუფლებას თქმით, ისინი ყოველთვის ითხოვდნენ და ახლაც ითხოვენ თავდაცვის ბიუჯეტის გაორმაგებასა და პროფესიონალური, მაღალტექნოლოგიური ძლიერი არმიის შექმნას.

  • პარტიის განცხადებით, საქართველოს სჭირდება არმია, რომელიც შედგება სამხედრო საქმით დაინტერესებული ადამიანებისაგან და არა იმ ხალხისგან, რომლებიც საკუთარი სურვილის საწინააღმდეგოდ მიჰყავთ.
  • "თითოეული ადამიანის სიცოცხლე არის უნიკალური და ამ სიცოცხლის თითოეული წამი არის მისი და მხოლოდ მისი საკუთრება. ამას ბიძინას მონები ვერასოდეს გაიაზრებენ. ამიტომ მათ უნდა წავართვათ ძალაუფლება", — წერს გირჩი — მეტი თავისუფლება.