ამის შესახებ ინფორმაციას მედუზა ავრცელებს.

რატომ არის მნიშვნელოვანი: ლატვიის ხელისუფლებას ტელეკომპანიის მიმართ რამდენიმე პრეტენზია აქვს.

  • ქვეყნის მარეგულირებელმა დოჟდი 10 000 ევროთი დააჯარიმა რუკისთვის, რომელშიც ტელევიზიამ ოკუპირებული ყირიმი რუსეთის შემადგენლობაში მონიშნა, რუსეთის არმიას კი "ჩვენი" უწოდა.
  • ასევე, ლატვიის სახელმწიფო უსაფრთხოების სამსახურმა გამოძიება დაიწყო ტელეკომპანიის ეთერში გაკეთებულ განცხადებებზე, რომლებიც აჩენდა ეჭვს, რომ დოჟდი დახმარებას რუსეთის საოკუპაციო ძალების სამხედროებს უწევდა.
  • პირველ დეკემბერს მედიასაშუალების პირდაპირ ეთერში ჟურნალისტმა, ალექსეი კოროსტელევმა მაყურებლებს მოუწოდა, მობილიზაციის დროს არსებულ დარღვევებზე მათთვის ეცნობებინათ, რადგან ტელეარხს შეეძლო, აღჭურვილობით დახმარებოდნენ ფრონტზე მყოფ რუს ჯარისკაცებს.
  • მოგვიანებით მედიასაშუალებამ განმარტა, რომ გადაცემის ფრაგმენტი წამყვანის სიტყვებით რუსი სამხედროებისთვის "დახმარებაზე" წაშალეს, ჟურნალისტთან კი თანამშრომლობა შეწყვიტეს.

დეტალები: შინაგან საქმეთა სამინისტროს გადაწყვეტილებით, ჟურნალისტს ლატვიის ტერიტორიაზე შესვლა ეკრძალება.

  • კოროსტელევი საქართველოში ცხოვრობს და ლატვიის ვიზა ან ბინადრობის ნებართვა არ აქვს, ამიტომ, როგორც გამოცემა იუწყება, ლატვიის ხელისუფლება მას სისხლისსამართლებრივ პასუხისმგებლობას ვერ წაუყენებს.