საქართველოს ოკუპირებული ტერიტორიებიდან გადაადგილებულ პირთა განსახლებისა და ლტოლვილთა მინისტრი, სოზარ სუბარი კოლეგის, საქართველოს განათლების მინისტრის მსგავსად, საქართველოდან გაუჩინარებული ჟურნალისტის, აფგან მუხტარლის საქმიანობას შეეხო.

"რას საქმიანობდა ეს ადამიანი აქ, მე არ ვიცი. ჟურნალისტი იყო, კი ბატონო, ვეთანხმები. იქნებ კიდევ სხვა ურთიერთობები ჰქონდა? რატომ გადავიდა, ჰქონდა თუ არა ფული ადგილზე? ეს ყველაფერი არის გამოსაძიებელი," - განაცხადა სუბარმა ტელეკომპანია პირველის ეთერში, დიანა ტრაპაიძის დღის ამბებში.

სუბარმა განაცხადა, რომ აზერბაიჯანელ ჟურნალისტს, აფგან მუხრტარლის მათ უწყებისთვის არ მიუმართავს.

"აქედან აპრიორი იმის თქმა, რომ ის იდევნებოდა იმის გამო, რომ რაღაცას იკვლევდა, ან არ იკვლევდა, გამიჭირდება. არ გამოვრიცხავ, რომ ეს ასე იყო, თუმცა, გამიჭირდება," - აღნიშნა სუბარმა.

რამდენიმე დღის წინ, 31 მაისს საქართველოს განათლების მინისტრისა და ვიცე-პრემიერის, ალექსანდრე ჯეჯელავას კომენტარი გავრცელდა. მისი თქმით, "ვრცელდებოდა ინფორმაცია", რომ აზერბაიჯანელი ჟურნალისტი, აფგან მუხტარლი რადიო თავისუფლების დაცვის თანამშრომელია და არა ჟურნალისტი. მოგვიანებით, ჯეჯელავამ თქვა, რომ მას არასწორი ინფორმაცია ჰქონდა.

29 მაისს, თბილისიდან გაუჩინარდა აზერბაიჯანის ხელისუფლების მიერ დევნილი ჟურნალისტი, აფგან მუხტარლი. მოგვიანებით გაირკვა, რომ ის აზერბაიჯანშია დაპატიმრებული, 31 მაისს კი, აზერბაიჯანის სასამართლომ მას სამთვიანი წინასწარი პატიმრობა შეუფარდა. საქართველოს შინაგან საქმეთა სამინისტრო ამ ეტაპზე მხოლოდ აზერბაიჯანელი კოლეგების მიერ მიწოდებულ ინფორმაციას აჟღერებს. აზერბაიჯანის ხელისუფლების ინფორმაციით, მუხტარლი საზღვრის უკანონო კვეთის გამო დააკავეს. თბილისში რამდენიმე დღეა ჟურნალისტები და არასამთავრობო ორგანიზაციები მუხტარლის მხარდასაჭერ აქციებს მართავენ.