საქართველოს მართლმადიდებელი ეკლესიის საპატრიარქო საკუთარი იურისტის, ედიშერ ქარჩავას განცხადებებს ემიჯნება, რომელიც მან დეკანოზ მამალაძის საქმესთან დაკავშირებით გააკეთა. საპატრიარქოს ცნობით, ქარჩავას ბოლოდროინდელი განცხადებები შეთანხმებული არ იყო.

"ის ფაქტი, რომ ზოგიერთი სასულიერო პირი კათოლიკოს-პატრიარქის ლოცვა-კურთხევასა და წმინდა სინოდის მოწოდებებს არღვევს და ნებართვის გარეშე სატელევიზიო გამოსვლებს არ ერიდება, ცალკე განსჯის საგანია, მაგრამ ასეთი ქცევა გამამართლებელი არ არის არავისთვის, მათ შორის, არც ბატონი ედიშერისთვის, რის გამოც იგი იქნა გაფრთხილებული," - წერია განცხადებაში.

საპატრიარქო, ასევე, მოუწოდებს ყველას, პირადი ინიციატივებისაგან შეიკავონ თავი.

ედიშერ ქარჩავამ საზოგადოებრივ მაუწყებელს განუცხადა, რომ ჭყონდიდის მიტროპოლიტ პეტრეს, თანამზრახველებთან, მათ შორის დეკანოზ გიორგი მამალაძესთან ერთად, ილია მეორის მკვლელობის სურვილი ჰქონდა.

მოგვიანებით ქარჩავამ On.ge-სთან განმარტა, რომ მეუფე პეტრეს ილია მეორის "სულიერი და ფიზიკური მოკვდინება" სურდა.