ზურა ჯაფარიძე პოლიტიკურ დევნილებს, რომლებიც საქართველოში ცხოვრობენ გირჩის წევრობას, ან ბიბლიური თავისუფლების მღვდელთმსახურებას სთავაზობს. ეს განცხადება ჯაფარიძემ საქართველოდან გატაცებულ აზერბაიჯანელ ჟურნალისტთან, აფგან მუხტარლისთან დაკავშირებით გააკეთა:

"ვინც საკუთარ ქვეყანაში მეტი თავისუფლებისთვის ბრძოლის გამო საქართველოს აფარებს თავს, მიგვაჩნია ჩვენს მეგობრებად და თანამებრძოლებად. როგორც ქართული სახელმწიფოს მონობისგან ვცდილობთ, ყველა საშუალებით დავიცვათ საქართველოს მოქალაქეები, ასევე ყველა ჩვენს ხელთ არსებულ შესაძლებლობას გამოვიყენებთ ასეთი ადამიანების დასაცავად. , საქართველოში მცხოვრებ უცხო ქვეყნის ნებისმიერ მოქალაქეს ან მოქალაქეობის არმქონე ადამიანს ვთავაზობთ გახდეს გირჩის წევრი, ან "ბიბლიური თავისუფლების" მღვდელთმსახური, რაც მათ თავის დასაცავად დამატებით იმუნიტეტს შესძენს".

გირჩის შეფასებით, აფგან მუხტარლის საქართველოში გაუჩინარება და შემდეგ შემდეგ აზერბაიჯანში, საპყრობილეში აღმოჩენა, არის ქვეყნის სირცხვილი და კონკრეტული ადამიანების მიერ ჩადენილი დანაშაული. ჯაფარიძის თქმით, კეთილმეზობლური ურთიერთობების შენარჩუნება მნიშვნელოვანია, მაგრამ არ არსებობს უფრო დიადი მიზანი, ვიდრე თავისუფალი ქვეყნის მშენებლობა, რაც, პირველ რიგში, უნდა ესმოდეს საქართველოს ყველა მეზობელ ქვეყანას.

"აფგან მუხთარლის საქმესთან დაკავშირებით, ყველა შესაძლო წყაროების გამოყენებით, შევაგროვებთ ინფორმაციას იმასთან დაკავშირებით, თუ როგორ მოხდა ამ ადამიანის დაკავება და შემდეგ გადაყვანა აზერბაიჯანის საზღვარზე. ჩვენ არ მივცემთ საშუალებას საქართველოს და აზერბაიჯანის სახელმწიფო სტრუქტურებს მიჩქმალონ ეს საქმე; ყველა ჩვენს მიერ შეკრებილ ინფორმაციას გავხდით საჯაროს როგორ საქართველოს მოქალაქეებისთვის ისე საერთაშორისო თანამეგობრობისთვის."

29 მაისს, თბილისიდან გაიტაცეს აფგან მუხტარლი, აზერბაიჯანის ხელისუფლების მიერ დევნილი ჟურნალისტი, რომელიც თავს თბილისს აფარებდა ოჯახთან ერთად. მისი ცოლის, ლეილა მუსტაფაევას თქმით, აფგანი თბილისში, სოლოლაკის ტერიტორიიდან გაუჩინარდა, მოგვიანებით კი აღმოჩნდა, რომ ის აზერბაიჯანშია დაპატიმრებული. მუსტაფაევას აინტერესებს, როგორ გადაკვეთა მუხტარლიმ საქართველო-აზერბაიჯანის საზღვარი მაშინ, როცა მისი პასპორტი თბილისში, სახლში ჰქონდა დატოვებული. თავად მუხტარლიმ აზერბაიჯანში ადვოკატს უთხრა, რომ ის ნაცემია. 31 მაისს, აზერბაიჯანის სასამართლომ აფგან მუხტარლის სამთვიანი წინასწარი პატიმრობა შეუფარდა.