ტელეკომპანია რუსთავი 2-ის გენერალურ დირექტორი, ნიკა გვარამია ამბობს, რომ თუ არხზე არსებულ ფინანსურ პრობლემებს ვერ მოაგვარებს, თანამდებობიდან გადადგება. ამ საკითხზე გვარამია არხის თანამშრომლების ნაწილსაც ესაუბრა და მან დრო ითხოვა. ამის შესახებ რუსთავი 2-ის დირექტორმა On.ge-ს უთხრა.

"ცხადია, თუ ადამიანი ვერ ახერხებს, თუნდაც ობიექტური მიზეზების გამო, ფინანსური სიტუაციის დალაგებას, უფასოდ ხომ არ ვამუშავებ ადამიანებს? ეს არ იყო უცხო ხალხის ყურისთვის, მაგრამ რადგან გამოიტანეს ეს ინფორმაცია და მეკითხებით, ვადასტურებ," - უთხრა On.ge-ს გვარამიამ და დასძინა, რომ რეორგანიზაციის გეგმა თუ არ გაამართლებს, "გააკეთებს სხვა".

როგორც გვარამია ამბობს, ის ცდილობს, რომ ტელევიზიაში არსებული პრობლემები სექტემბრამდე მოაგვაროს. თუმცა, მძიმე მოცემულობად მიაჩნია ის, რომ კომპანიას ბანკიდან კრედიტის აღება არ შეუძლია.

რუსთავი 2-ში რეორგანიზაცია რამდენიმე კვირის წინ დაიწყო. არხზე მიმდინარე რეორგანიზაციის შესახებ ინფორმაცია On.ge-მ 31 მარტს დაწერა. როგორც გვარამია ამბობს, არხზე მიმდინარე რეორგანიზაციის პროცესში 100-მდე თანამშრომელი გათავისუფლდა. რეორგანიზაციის პროცესში გათვალისწინებულია ხელფასების შემცირებას.