20 ნოემბერს კატარში 2022 წლის მსოფლიო საფეხბურთო ჩემპიონატი დაიწყო. ერთ-ერთ თამაშზე, სადაც ერთმანეთს ინგლისისა და ირანის ეროვნული ნაკრებები დაუპირისპირდნენ, ამ უკანასკნელმა გადაწყვიტა, სახელმწიფო ჰიმნი არ შეესრულებინა.

ირანის გუნდის 11-ვე მოთამაშე ხალიფას საერთაშორისო სტადიონზე მატჩის დაწყებამდე ჩუმად იდგა. როგორც ჩანს, ეს ერთგვარი საპროტესტო გზავნილია, რომელიც ირანში მიმდინარე დემონსტრაციებს უკავშირდება.

ირანელი გულშემატკივრები მსოფლიო ჩემპიონატზე საპროტესტო ბანერებით

ფოტო: Paul Childs / Reuters

უკვე ორი თვეა, ირანში საპროტესტო გამოსვლები მიმდინარეობს. მასშტაბური დემონსტრაციები მას შემდეგ დაიწყო, რაც სექტემბერში ეგრეთ წოდებული მორალის პოლიციის მიერ "ჰიჯაბის ტარების წესის" დარღვევისთვის ნაცემი 22 წლის ქალი, მაჰსა ამინი, გარდაიცვალა.

მოგვიანებით, საპროტესტო აქციებზე გამოსულმა ირანელმა ქალებმა თავიანთი ჰიჯაბებიც დაწვეს. თუმცა, დემონსტრაციებს მსხვერპლიც მოჰყვა. ქვეყნის 31 პროვინციასა და 133 ქალაქში მიმდინარე გამოსვლებზე, სხვადასხვა წყაროს ცნობით, ათობით ადამიანი დაიღუპა. გარდა ამისა, გაურკვეველ გარემოებაში თავი მოიკლა აქციების მონაწილე მოზარდმაც. გასულ თვეში ირანში სასიკვდილოდ სცემეს სკოლის მოსწავლეც, რომელმაც რეჟიმის სადიდებელი ჰიმნი არ იმღერა. ქვეყნის "უსაფრთხოების ძალებმა" მოკლეს აქციების მონაწილე კიდევ ერთი მოსწავლე, სასამართლომ კი ცოტა ხნის წინ ერთ-ერთ დემონსტრანტს ასევე სასიკვდილო განაჩენი გამოუტანა.