საქართველოს განათლებისა და მეცნიერების მინისტრის, ვიცე-პრემიერის, ალექსანდრე ჯეჯელავას განცხადება იმის შესახებ, რომ აფგან მუხთარლი ჟურნალისტი არ არის, ტყუილია.

ჯეჯელავამ მუხთარლის ჟურნალისტობა ეჭვქვეშ დააყენა, მისი კომენტარი ინტერპრესნიუსმა გაავრცელა:

"ისიც, რომ ჟურნალისტი იყო, ალბათ თქვენც უნდა გადაამოწმოთ, რადგან არის ინფორმაცია რომ ის იყო რადიო „თავისუფლების“ დაცვის თანამშრომელი, ანუ ჟურნალისტიკასთან რაღაც კავშირი აქვს, მაგრამ უშუალოდ ჟურნალისტი არ არის. მე ვფიქრობ, გამოძიება აუცილებლად დაადგენს რეალობას, სად და რა პირობებში დააკავეს იგი".

მუხთარლის ცოლმა, ასევე ჟურნალისტმა ლეილა მუსტაფაევამ On.ge-სთან საუბარში სიცრუე უწოდა ჯეჯელავას განცხადებას და მას ჰკითხა, ჰქონდა თუ არა ნანახი მუხთარლის ჟურნალისტური გამოძიებები, რომელსაც ის ამზადებდა.

აფგან მუხთარლი წლებია ჟურნალისტად მუშაობს. მისი არაერთი ჟურნალისტური ნამუშევრის ნახვაა შესაძლებელი როგორც IWPR-ის, ისე, Meydan TV-ს ვებსაიტებზე. მისი კრიტიკული სტატიების მთავარი ობიექტი ალიევის რეჟიმი და აზერბაიჯანში არსებული კორუფციული სისტემაა.

მაგალითად, ერთ-ერთ სტატიაში მუხთარლი წერს იმ მიზეზებზე, რის გამოც, ალიევის ხელისუფლებამ 100 მეტი პოლიტპატიმარი გაუშვა ციხიდან. სტატიაში აღნიშნულია, რომ აღნიშნული ნაბიჯი სპეციალურად დაემთხვა პრეზიდენტ ალიევის ვიზიტს აშშ-ში, რათა მას თავიდან აეცილებინა მოსალოდნელი სანქციები ოპოზიციონერთა დატყვევების გამო.

აზერბაიჯანელმა ჟურნალისტმა ასევე კრიტიკული სტატია მიუძღვნა აზერბაიჯანში სუიციდის შემთხვევების კრიტიკულ მატებას. სტატიაში ნათქვამია, რომ აღნიშნული პირდაპირ არის დაკავშირებული აზერბაიჯანის ავტორიტარული რეჟიმის რეპრესიულ პოლიტიკასთან, ასევე, ხელისუფლების მიერ გადადგმულ ეკონომიკურ ნაბიჯებთან, რამაც აზერბაიჯანის მოსახლეობა მძიმე დღეში ჩააგდო.

აფგან მუხთარლის სხვა არაერთი მსგავსი, კრიტიკული სტატია აქვს მომზადებული აზერბაიჯანში არსებული პრობლემების შესახებ, რომელთა ნახვაც შეგიძლიათ აქ.

აფგან მუხთარლი აზერბაიჯანის ხელისუფლების მიერ დევნილი ჟურნალისტია, რომელიც თავს თბილისს აფარებდა ოჯახთან ერთად. მისი ცოლის, ლეილა მუსტაფაევას თქმით, აფგანი თბილისში, სოლოლაკის ტერიტორიიდან 29 მაისს დაიკარგა, მოგვიანებით კი აღმოჩნდა, რომ ის აზერბაიჯანშია დაპატიმრებული საზღვრის უკანონოდ კვეთის ბრალდებით. მუსტაფაევას თქმით, მას აინტერესებს, როგორ გადაკვეთა მუხთარლიმ საქართველო-აზერბაიჯანის საზღვარი მაშინ, როცა მისი პასპორტი თბილისში, სახლში ჰქონდა დატოვებული. თავად მუხთარლიმ აზერბაიჯანში ადვოკატს უთხრა, რომ ის ნაცემია.

საქართველოს შინაგან საქმეთა სამინისტრო ამბობს, რომ მათ გამოძიება ადამიანის თავისუფლების უკანონოდ აღკვეთის მუხლით დაიწყეს, თუმცა, ჯერ არ განუმარტავთ, როგორ აღმოჩნდა თბილისში დაკარგული ჟურნალისტი ბაქოს ციხეში. აფგან მუხთარლში ჯერ კიდევ რამდენიმე დღის წინ ამბობდა, რომ აზერბაიჯანის ხელისუფლების მიერ დევნილ პირებს საქართველოში საფრთხე ემუქრებათ, რადგან მათ თავშესაფარს არ აძლევენ და უკან, აზერბაიჯანში აბრუნებენ, სადაც წამება და მრავალწლიანი პატიმრობა ელოდებათ