შეხვედრის ამსახველი კადრები უკრაინის პრეზიდენტმა თავად გაავრცელა.

რატომ არის მნიშვნელოვანი: პრემიერმინისტრის რანგში ეს სუნაკის პირველი ვიზიტია უკრაინაში.

  • ვოლოდიმირ ზელენსკიმ იგი კიევში პირველი სატელეფონო საუბრისას მიიწვია.
  • როგორც გაერთიანებული სამეფოს პრემიერი ამბობს, შეხვედრა უკრაინისადმი მუდმივი მხარდაჭერის დასადასტურებლად გაიმართა.
  • ბრიტანეთის ახალი პრემიერი უფლებამოსილების შესრულებას ოფიციალურად 25 ოქტომბერს შეუდგა; მან პირველივე დღეებში გამოხატა მხარდაჭერა უკრაინის მიმართ და პუტინის ომი დაგმო.

დეტალები: ზელენსკის თქმით, შეხვედრაზე უკრაინისა და ევროპის ენერგეტიკულ უსაფრთხოებაზე ისაუბრეს.

  • განსახილველ საკითხებს შორის იყო უკრაინის ცის დაცვა და ორ ქვეყანას შორის თავდაცვითი თანამშრომლობაც.
  • "ჩვენ განვიხილეთ ყველაზე მნიშვნელოვანი საკითხები, როგორც ჩვენი ქვეყნებისთვის, ასევე, გლობალური უსაფრთხოებისთვის", — განაცხადა უკრაინის პრეზიდენტმა.
  • მისი თქმით, ომის პირველივე დღიდან უკრაინა და ბრიტანეთი ძლიერი მოკავშირეები იყვნენ.

ბრიტანეთის პრემიერმინისტრის განცხადებით, უკრაინას საჰაერო თავდაცვის ახალი სისტემებით დაეხმარებიან და მომავალი ცივი და მძიმე ზამთრისთვის ჰუმანიტარულ დახმარებას გააძლიერებენ.

  • BBC-ის ცნობით, ზელენსკისთან შეხვედრის დროს სუნაკმა თქვა, რომ 60 მილიონი დოლარის ღირებულების საჰაერო თავდაცვის ახალი პაკეტი უკრაინას რუსეთის თავდასხმისგან მშვიდობიანი მოსახლეობისა და ქვეყნის ეროვნული ინფრასტრუქტურის დაცვაში დაეხმარება.
  • ბრიტანეთი, ასევე, გამოყოფს $14 მილიონს უკრაინაში სასურსათო კრიზისთან გასამკლავებლად და $5 მილიონს — მიგრანტთა დასახმარებლად.
  • შეხვედრაზე აღინიშნა ისიც, რომ ბრიტანეთი უკრაინის შეიარაღებული ძალებისთვის საწვრთნელ შეთავაზებას გაზრდის და რეგიონში ექსპერტ სამხედრო მედიკოსებსა და ინჟინრებს გაგზავნის.
  • "დიდი ბრიტანეთი და ჩვენი მოკავშირეები გააგრძელებენ უკრაინის გვერდით დგომას, რადგან ის იბრძვის ამ ბარბაროსული ომის დასასრულებლად და სამართლიანი მშვიდობის მისაღწევად", — განაცხადა სუნაკმა.