სამართლიანი არჩევნებისა და დემოკრატიის საერთაშორისო საზოგადოება საარჩევნო სისტემის ე.წ. გერმანული მოდელის შესახებ განცხადებას ავრცელებს, რომ აღნიშნული ცვლილებით 2016 წლის საარჩევნო სისტემას გაუმჯობესების შანსი ექმნება.

ორგანიზაციის განცხადებით, ცვლილება საარჩევნო სისტემას გაცილებით უფრო სამართლიანს გახდის, კერძოდ, ამომრჩეველთა ნება საპარლამენტო მანდატებში მეტი პროპორციულობით აისახება:

"მოვუწოდებთ ყველა პოლიტიკურ პარტიას ხელიდან არ გაუშვას საარჩევნო სისტემის გაჯანსაღების ისტორიული შანსი, მონაწილეობა მიიღოს საპარლამენტო სესიაზე კანონპროექტის განხილვაში და მხარი დაუჭიროს მის მიღებას".

1 ივნისს იურიდიულ საკითხთა კომიტეტმა კენჭისყრის შედეგად, პროექტს მხარი არ დაუჭირა. კანონპროექტის ინიცირებამდე წინასწარი კონსულტაციები გაიმართა წამყვან პოლიტიკურ პარტიებსა და საარჩევნო საკითხებზე მომუშავე საზოგადოებრივ ორგანიზაციებს შორის, რომლის დროსაც, შეთანხმება იქნა მიღწეული, რომ პარლამენტში მყოფი ოპოზიციური პოლიტიკური ჯგუფები მხარს დაუჭერდნენ ე.წ. გერმანულ მოდელს.

კანონპროექტს მხარი ფრაქცია „რესპუბლიკელებმა“, „თავისუფალმა დემოკრატებმა”, „ეროვნულმა ფორუმმა” და დამოუკიდებელმა დეპუტატმა დაუჭირა. საპარლამენტო საქმიანობის ბოიკოტირების გამო სხდომას არ ესწრებოდა საპარლამენტო უმცირესობის („ერთიანი ნაციონალური მოძრაობა”) ხუთი წევრი, შესაბამისად მათ მონაწილეობა არ მიუღიათ კენჭისყრაში და ვერ მოხერხდა კანონპროექტის გასვლისთვის საჭირო ხმების შეგროვება. კანონპროექტს მხარი არ დაუჭირა საპარლამენტო უმრავლესობის ორმა წევრმა. ვინაიდან, კენჭისყრის წინ რეგისტრაცია კომიტეტის ცამეტმა წევრმა გაიარა, შვიდი ხმა საკმარისი იქნებოდა კანონპროექტის მისაღებად.