ამის შესახებ ნაციონალური მოძრაობის წევრმა გამართულ ბრიფინგზე განაცხადა.

რატომ არის მნიშვნელოვანი: აქამდე ხაბეიშვილი ამბობდა, რომ არჩევნებში მონაწილეობას არ აპირებს.

  • 9 ნოემბერს ენმ-ის წევრთა ნაწილმა ყველა დონეზე შიდაპარტიული არჩევნები მოითხოვა. მათი თქმით, თავიდან უნდა აირჩიონ პოლიტიკური სამდივნო, პოლიტიკური საბჭო და საჭიროა თავმჯდომარის არჩევნებიც.
  • ენმ-ის თავმჯდომარემ, ნიკა მელიამ თქვა, რომ კოლეგებს ახალი არაფერი უთქვამთ და ამ საკითხებზე შიდაპარტიული, აქტიური, ყოველდღიური მსჯელობა მიმდინარეობდა კონსოლიდირებული პოზიციის ჩამოსაყალიბებლად.
  • ასევე, აღნიშნა რომ უახლოესი პერიოდი აუცილებლად გამოაჩენს რა იყო ამ საკითხის "ამ ფორმით, ასე ნაჩქარევად" გამოტანის რეალური მიზეზი და მიზანი, მაშინ, როცა ევროპარლამენტის განცხადებებზე უნდა ესაუბრათ.

დეტალები: ხაბეიშვილის თქმით, მიზანი ნიჰილიზმის დაძლევა და ხალხისთვის რწმენის დაბრუნებაა. ამბობს, რომ ენმ-ში წარსულს უნდა ჩაბარდეს ყველა დაპირისპირება და გაუგებრობა.

  • "ენმ-ს სჭირდება გამაერთიანებელი თავმჯდომარე და არა დამყოფი, დამაპირისპირებელი. პარტიის ისტორია, ამომრჩეველი იმსახურებს მეტს და ეს ადამიანები ჩვენგან ელიან დაუღალავ შრომას".
  • მისივე თქმით, ბრძოლაში ხელს უწვდიან ყველას, ვისთვისაც ისტორიული უსამართლობაა "თანამედროვე სახელმწიფოს დამფუძნებლის, მიხეილ სააკაშვილის ტყვეობა".
  • ასევე, მათ, ვისთვისაც ნიკა გვარამიას ტყვეობიდან დახსნა მნიშვნელოვანი საკითხია.

გარდა ამისა, ხაბეიშვილმა აღნიშნა, რომ შეიქმნება შტაბი მიხეილ სააკაშვილის გასათავისუფლებლად, რომელსაც გიორგი ჩალაძე უხელმძღვანელებს.

  • მისი თქმით, მასში გაერთიანდებიან როგორც პოლიტიკოსები, ასევე ექიმები, სამოქალაქო სექტორის წარმომადგენლები და ის ადამიანები, ვისაც სააკაშვილის ჯანმრთელობა და სიცოცხლე აინტერესებთ.
  • "მოვუწოდებ ყველას, ვინც აპირებს მონაწილეობა მიიღოს პარტიულ არჩევნებში, რომ თავი ავარიდოთ პერსონალურ თავდასხმებს, ვაჩვენოთ ჩვენს გულშემატკივრებსაც და მტრებსაც, რომ ენმ არის ღირებულებებზე დაფუძნებული პარტია".
  • "ვაჩვენოთ ჩვენს მომხრეებს, რომ მიუხედავად მრავალი წინააღმდეგობისა, ენმ არის ერთიანი და ძლიერი. ხალხს შევთავაზოთ ხედვები, იდეები და შიდა პარტიული არჩევნები არ გადავზარდოთ პიროვნულ დაპირისპირებაში, იყოს საქმიანი დებატები".

ხაბეიშვილი ამბობს, რომ არჩევნებში მონაწილეობის გამოწვევას არა ვინმეს საწინააღმდეგოდ, არამედ პარტიის გასაძლიერებლად იღებს.

  • "ვიღებ გამოწვევას, რომ დაბრუნდეს ძლიერი, აქტიური ნაციონალური მოძრაობა და შესაბამისად, დაბრუნდეს რეალური, უკომპრომისო, მებრძოლი ოპოზიცია პოლიტიკაში".
  • "ჩემი მიზანია, ენმ დავუბრუნო იმ ხალხს, ვისაც ეს ეკუთვნის, მის ამომრჩეველს და მის მხარდამჭერებს და ყველას, ვისთვისაც ნაციონალური მოძრაობა რუსი ოლიგარქის, ბიძინა ივანიშვილის დამარცხების მთავარი პლატფორმა და შესაძლებლობაა".