გოგი წუალაიას ბრალი 2 მუხლით ჰქონდა წარდგენილი, საიდანაც ერთში გამართლდა, მეორეში კი დამნაშავედ ცნეს.

რატომ არის მნიშვნელოვანი: პოლიტიკოსი გოგი წულაია 2021 წლის 17 მარტს ნაცნობ ქალზე ფიზიკური ძალადობის გამო დააკავეს.

  • 2021 წლის 18 მარტს კი ძალადობით ჩადენილი სექსუალური ხასიათის სხვაგვარი ქმედების მუხლით ბრალი დაუმძიმდა.
  • 2021 წლის პირველ ივლისს კი წულაია 6 000-ლარიანი გირაოს საფუძველზე პატიმრობიდან გაათავისუფლეს.

დეტალები: პროკურატურის ცნობით, 2022 წლის 11 ნოემბერს წულაია სასამართლომ სისხლის სამართლის კოდექსის 138-ე მუხლის პირველი ნაწილით წარდგენილ ბრალდებაში გამართლდა, რაც ძალადობით ჩადენილ სექსუალური ხასიათის სხვაგვარ ქმედებას გულისხმობს.

  • ხოლო დამნაშავედ ცნეს 126-ე მუხლის პირველი ნაწილით (ძალადობა, რამაც დაზარალებულის ფიზიკური ტკივილი გამოიწვია).

გოგი წულაიას 6-თვიანი პატიმრობა მიუსაჯეს. თუმცა როგორც მისმა ადვოკატმა, ვალერი გელბახიანმა On.ge-ს უთხრა, პოლიტიკოსი ამ საქმეზე 4 თვის განმავლობაში იმყოფებოდა წინასწარ პატიმრობაში, შესაბამისად, მხოლოდ ორთვიანი პატიმრობა ელის.

  • მაგრამ ადვოკატის განცხადებით გოგი წულაია საფრანგეთში რამდენიმე თვეა ცხოვრობს და აპირებს იქ თავშესაფარი მოითხოვოს.

პროკურატურის განცხადებით, საქალაქო სასამართლოს გადაწყვეტილებას არ ეთანხმებიან და სააპელაციოში გაასაჩივრებენ.

  • სასამართლოს გადაწყვეტილების გასაჩივრებას გოგი წულაიას ადვოკატიც გეგმავს.