უკრაინაში რუსული დაჯგუფების მეთაურმა, სერგეი სუროვიკინმა, თავდაცვის მინისტრს ხერსონის რეგიონში ჯარების დნეპრის მარცხენა სანაპიროზე გაყვანა შესთავაზა. სერგეი შოიგუ კი ხერსონიდან ძალების გაყვანას დათანხმდა. დეტალურად განვიხილოთ რა მოხდა.

რატომ არის მნიშვნელოვანი: გარდა იმისა, რომ ხერსონი სტრატეგიული და სიმბოლური მნიშვნელობისაა, რუსეთმა ამ რეგიონის ანექსია გამოაცხადა, რაც კრემლისთვის იმას ნიშნავს, რომ ახლა რუსეთი "თავის ტერიტორიაზე" იხევს უკან.

• მეტი კონკრეტიკისთვის კი ვიტყვით — ეს ნიშნავს ქალაქ ხერსონის "დათმობას".

ხერსონის სტრატეგიული მნიშვნელობა: ომამდე ქალაქში 300 000 მოსახლე ცხოვრობდა, თუმცა უკრაინაში ვარაუდობენ რომ ნახევარმა ომის მიმდინარეობისას დატოვა.

• ხერსონი პირველი ქალაქი იყო, რომელიც ოკუპანტებმა დაიკავეს უკრაინაში სრულმასშტაბიანი ომის დაწყების შემდეგ.
• ხერსონი მოიცავს ერთადერთ სახმელეთო გზას ყირიმის ნახევარკუნძულამდე, ასევე მდინარე დნეპრის შესართავთან, რომელიც სასიცოცხლოდ მნიშვნელოვანი არტერიაა უკრაინისთვის.

როგორ მიიწევდა წინ უკრაინის არმია: 29 აგვისტოს უკრაინა შეტევაზე გადავიდა, რის შემდეგაც წარმატებით ათავისუფლეს დასახლებებს, მათ შორის, ხერსონში.

• 5 ოქტომბერს, ხერსონში წარუმატებელი ბრძოლების შემდეგ რუსეთი, ტრადიციულად, "გადაჯგუფებაზე" ალაპარაკდა.
• 19 ოქტომბერს რუსების ჯარების მეთაურმა აღიარა, რომ ამ მიმართულებით დაძაბული ვითარება ჰქონდათ.
• 21 ოქტომბრის მონაცემებით, უკრაინას ხერსონის რეგიონში 88 დასახლებული პუნქტი ჰქონდა გათავისუფლებული.
• 22 ოქტომბერს ომის კვლევის ინსტიტუტმა ანგარიშში აღნიშნა, რომ ოკუპანტებმა დასავლეთ ხერსონიდან უკან დახევა დაიწყეს.
• 4 ნოემბერს აშშ-ის თავდაცვის მინისტრმა განაცხადა, რომ მდინარე დნიპროს დასავლეთ მხარეს და ხერსონში უკრაინელებს ტერიტორიის გათავისუფლება შეუძლიათ.

გარდა ამისა, რადიო თავისუფლების რუსული ბიურო წერს, რომ ბოლო დღეებში ხერსონიდან დაიწყო რუსეთის სახელმწიფო დაწესებულებების, საბჭოთა და რუსი მოღვაწეების ძეგლების, თავად გრიგორი პოტემკინ-ტავრიჩესკის ფერფლის "ევაკუაცია".

• "ადმინისტრაციული შენობებიდან რუსეთის დროშები ჩამოხსნეს. ამავდროულად, ოფიციალურად ბოლო მომენტამდე ამბობდნენ, რომ ქალაქი თავდაცვისთვის ემზადებოდა", — წერს გამოცემა.
• დღეს ცნობილი გახდა, რომ ოკუპანტებმა ხერსონში ხიდების მასიური აფეთქება დაიწყეს — ამბობდნენ, რომ უკრაინის შეიარაღებული ძალების წინსვლის შესაჩერებლად.

რუსეთის ოფიციალური მარცხი: სუროვიკინის მოხსენება შოიგუსადმი რუსული ტელევიზიების ეთერში გავიდა. ის ამბობდა, რომ დნეპრის მარჯვენა სანაპიროზე რუსული დაჯგუფებების აღჭურვა უჭირთ.

• "მიზანშეწონილია თავდაცვის ორგანიზება მდინარე დნეპრის ბარიერის ხაზის გასწვრივ, მისი მარცხენა სანაპიროზე", — განაცხადა გენერალმა და დაამატა, რომ გადაწყვეტილება ადვილი არ იყო, მაგრამ ამ გზით რუსი სამხედროების სიცოცხლის გადარჩენას შეეცდებიან.
• როგორც მედუზა წერს, შოიგუმ ბრანება გასცა, რომ დაიწყონ რუსული ჯარების გაყვანა მდინარე დნეპრზე.
• სუროვიკინი ასევე ამტკიცებდა, რომ უკრაინამ, სავარაუდოდ, 9,5 ათასი ჯარისკაცი დაკარგა ხერსონის რეგიონში ბრძოლებში, ხოლო რუსეთმა — 7-8-ჯერ ნაკლები.

უკვე დაიწყო ამ გადაწყვეტილების გამართლების მცდელობები. მაგალითად, ვაგნერის დამფუძნებელმა, პროპაგანდისტულ რიას უთხრა, რომ მინიმალური დანაკარგებით ჯარების გაყვანა სუროვიკინის მიღწევაა.

• "მნიშვნელოვანია არ ვიტანჯოთ, არ ვიბრძოლოთ პარანოიაში, არამედ გამოვიტანოთ დასკვნები და ვიმუშაოთ შეცდომებზე. და ამის შემდეგ გავიგოთ ვინ არის მართალი, ვინ არის დამნაშავე და რა არის პრობლემის არსი", — განაცხადა პრიგოჟინმა.
• პუტინის მთავარმა მხარდაჭერმა, რამზან კადიროვმა კი ტელეგრამზე დაწერა, რომ სრულად ეთანხმება სუროვიკინის გადაწყვეტილებას და მან რთული, მაგრამ სწორი გადაწყვეტილება მიიღო.

უკრაინას ჯერ ოფიციალური კომენტარი არ გაუკეთებია, თუმცა როგორც ადგილობრივი ტელეგრამ არხი ქვეყნის პოლიტიკა წერს, შეიარაღებული ძალების მებრძოლებისგან გაიგეს, რომ უკვე შედიან სოფლებში.

განახლება [21:00]: უკრაინის პრეზიდენტის ადმინისტრაციის მრჩეველმა Reuters-თან განაცხადა, რომ რუსული ჯარების გაყვანაზე საუბარი ჯერ ნაადრევია.

• გარდა ამისა, პოდოლიაკმა ტვიტერზე დაწერა, რომ უკრაინა ვერ ხედავს ნიშნებს, რუსები უბრძოლველად ტოვებდნენ ხერსონს.
• პრეზდენტის ადმინისტრაციის კიდევ ერთმა წევრმა, ალექსეი არესტოვიჩმა კი განაცხადა, რომ რუსები ხერსონს კი არ ტოვებენ, ისინი ხერსონიდან გააძევეს.