საერთაშორისო გამჭვირვალობა — საქართველოს კვლევის მიხედვით, 2022 წლის მარტიდან საქართველოში პანდემიასთან დაკავშირებული შეზღუდვების სრულად მოხსნის და ომის გამო, რუსეთიდან ვიზიტორების შემოსვლა მნიშვნელოვნად გაიზარდა.

რატომ არის მნიშვნელოვანი: 2019 წლის იანვარ-სექტემბერთან შედარებით, რუსეთიდან შემოსული ვიზიტორების რაოდენობა მაინც 35%-ით ნაკლებია. თუმცა, ცალკე აღებულ აგვისტო-სექტემბერში, წელს რუსეთიდან 6%-ით მეტი ვიზიტორი შემოვიდა, ვიდრე 2019 წლის აგვისტო-სექტემბერში;

  • 2022 წლის იანვარ-სექტემბერში რუსი ვიზიტორების წილი საქართველოს ვიზიტორების ჯამურ რაოდენობაში 20% იყო, რაც 2021 წლის მაჩვენებელს 2-ჯერ აღემატება — აღსანიშნია, რომ 2020-2021 წლებში პანდემიის გამო ტურიზმი ძალიან შემცირებული იყო.
  • მიმდინარე წლის სექტემბერში დაფიქსირებული ზრდა, რუსეთში მობილიზაციის გამოცხადებას უკავშირდება — შსს-ის ინფორმაციით, 23-26 სექტემბერს რუსეთიდან დღეში საშუალოდ 10 150 ადამიანი შემოდიოდა, რაც 60%-ით მეტია 17-21 სექტემბრის საშუალო დღიურ მაჩვენებელზე.

დეტალები: კვლევის მიხედვით, მიმდინარე წლის იანვარ-სექტემბერში რუსმა ვიზიტორებმა საქართველოში 563 მლნ აშშ დოლარი დახარჯეს, რაც 2019 წლის ანალოგიური მაჩვენებელზე 13%-ით ნაკლებია.

  • თუმცა, ეს ჩამორჩენა იანვარ-ივნისზე მოდის, ივლის-სექტემბერში 2022 წელს რუსმა ვიზიტორებმა საქართველოში 138 მლნ აშშ დოლარით მეტი დახარჯეს, ვიდრე 2019 წლის ანალოგიურ თვეებში.
  • საქართველოში შემოსული ვიზიტორებისგან მიღებულ შემოსავალში 2022 წლის 9 თვეში რუსი ვიზიტორებისგან 22,4% იყო.
  • ორგანიზაციის განცხადებით, რუსი ვიზიტორების ნაწილი რეალურად ემიგრანტია და საქართველოში ხანგრძლივი ვადით დასახლდა — ამას მიანიშნებს, როგორც კომპანიების რეგისტრაცია, ისე საქართველო-რუსეთის საზღვრის ორმხრივად კვეთის (შემოსვლა-გასვლა) სტატისტიკა და რუსეთის მოქალაქეების მიერ ქართულ ბანკებში 10 ათასობით ანგარიშის გახსნა.