საქართველოს ახალგაზრდა იურისტთა ასოციაციაში და საერთაშორისო გამჭვირვალობა - საქართველოში მიაჩნიათ, რომ საქართველოს იუსტიციის უმაღლეს საბჭოში მოსამართლეთა შერჩევა/დანიშვნის პროცესი გაუმჭვირვალეა და ეჭვებს აჩენს. ამის შესახებ ამ არასამთავრობო ორგანიზაციების მიერ ერთობლივად ჩატარებულ კვლევაში ვკითხულობთ, რომელიც დღეს გამოქვეყნდა.

ორგანიზაციებში მიიჩნევენ, რომ იუსტიციის საბჭოში არ არის პლურალისტური გარემო და მოსამართლეთა ანგარიშვალდებულების სისტემა არაეფექტურია, რაც საფრთხეს უქმნის მოსამართლეთა დამოუკიდებლობას.

"შენარჩუნდა სასამართლოს/პალატის/კოლეგიის თავმჯდომარეების მოვალეობის შემსრულებლების დანიშვნის მანკიერი პრაქტიკა და სხვადასხვა სასამართლოებში თავმჯდომარეთა დანიშვნის პროცესში საბჭოს არაერთგვაროვანი მიდგომა," - აღნიშნავენ ორგანიზაციებში.

კვლევის დროს ორგანიზაციებმა გამოკვეთეს შემდეგი სახის პრობლემატური საკითხები:

  • საბჭოში რეალური დისკუსიების დეფიციტია, რამდენიმე მნიშვნელოვან საკითხზე განსხვავებული პოზიცია მხოლოდ პრეზიდენტის კვოტით დანიშნულმა საბჭოს წევრმა გააჟღერა;
  • კვლავ დაბალია საბჭოს სხდომების გამჭვირვალობის ხარისხი;
  • მოსამართლეთა შესარჩევი კონკურსები ტოვებდა კონკურსის პროცესისადმი საბჭოს მხოლოდ ფორმალური მიდგომის შთაბეჭდილებას;
  • ბოლო ორი წლის განმავლობაში იუსტიციის უმაღლესმა საბჭომ სკოლაში მისაღები კონკურსი მხოლოდ ერთხელ ჩაატარა, რაც კანდიდატების მრავალფეროვნებას ხელს უშლის;
  • ხარვეზიანი კანონმდებლობა ხელს უწყობს სასამართლოს/პალატის/კოლეგიის თავმჯდომარეთა დანიშვნის მანკიერი პრაქტიკის დამკვიდრებას;
  • დისციპლინური საჩივრების განხილვის დაყოვნება და წლების წინ შეტანილი საჩივრების განხილვის განახლება საფრთხის შემცველია სასამართლოს შიდა დამოუკიდებლობისთვის;
  • გამოსაცდელი ვადით დანიშნული მოსამართლის შეფასების წესი არ შეიცავს ობიექტური და გამჭვირვალე პროცესით შეფასებისთვის საჭირო გარანტიებს და იძლევა სუბიექტური და თვითნებური გადაწყვეტილების მიღების შესაძლებლობას;
  • გამოსაცდელი ვადით დანიშნული მოსამართლეების შეფასების ანგარიშები დაუსაბუთებელია.

მონიტორინგი აშშ-ის საერთაშორისო განვითარების სააგენტოს (USAID) დახმარებით ჩატარდა.

ამ ანგარიშის პრეზენტაცია დღეს უნდა გამართულიყო, თუმცა, საქართველოს ახალგაზრდა იურისტთა ასოციაციამ და საერთაშორისო გამჭვირვალობა - საქართველომ იუსტიციის უმაღლესი საბჭოს მონიტორინგის ანგარიში, პროტესტის ნიშნად, პრესკონფერენციაზე არ წარადგინეს. ორგანიზაციებში მიიჩნევენ, რომ სასამართლო სისტემაში სერიოზული კრიზისია და სასამართლო რეფორმა სწორ გზაზე არ დგას.