საქართველოს შინაგან საქმეთა სამინისტროს ცენტრალური კრიმინალური პოლიციის დეპარტამენტის თანამშრომლებმა 200 ათასი ამერიკული დოლარის გამოძალვის ბრალდებით ორი პირი დააკავეს. ამის შესახებ ინფორმაციას უწყების პრესსამსახური ავრცელებს.

შსს-ს ინფორმაციით, გამოძიებით დადგინდა, რომ დაკავებულები ერთ-ერთ ბიზნესმენს, ფულს სიცოცხლის მოსპობის მუქარით სძალავდნენ.

"სამართალდამცველებმა ბრალდებულები მანამდე დააკავეს, ვიდრე ბიზნესმენი მათ მოთხოვნილ თანხას გადასცემდა," - აღნიშნავენ შსს-ში.

უწყება გამოძიებას საქართველოს სისხლის სამართლის კოდექსის 181-ე მუხლის მეორე ნაწილის "გ" ქვეპუნქტით ატარებს. ამ მუხლით მუქარით დიდი ოდენობით სარგებლობის მოთხოვნა ისჯება თავისუფლების აღკვეთით ვადით ოთხიდან შვიდ წლამდე.