გათავისუფლებული თანამშრომელი ამბობს, რომ მორიგი რეპრესიული წმენდა განხორციელდა, სააგენტოში კი "სტრუქტურული ცვლილებებზე" საუბრობენ.

რატომ არის მნიშვნელოვანი: მას შემდეგ რაც თეა წულუკიანი კულტურისა და სპორტის მინისტრი გახდა, მის დაქვემდებარებაში არსებული ქვეუწყებებიდან თანამშრომლებს მასიურად ათავისუფლებენ.

  • ხელოვნების სფეროს და სამოქალაქო სექტორის წარმომადგენლები ამას რეპრეისიებად აფასებენ, თუმცა, თავად მინისტრი რეფორმებს უწოდებს.
  • რეორგანიზაციის მიზეზით, თანამშრომლები გაუშვეს ეროვნული მუზეუმიდან — სასამართლომ მათი ნაწილის გათავისუფლება უკანონოდ მიიჩნია და აღდგენა დააავალა.
  • გარდა ამისა, ომბუდსმენმა ხელოვნების მუზეუმის ყოფილი თანამშრომლების მიმართ დისკრიმინაციული მოპყრობა დაადგინა.
  • რამდენიმე დღის წინ კი სასამართლომ კულტურული მემკვიდრეობის დაცვის სააგენტოს თანამშრომლის სასარგებლოდ იძულებით გაცდენილი დროის ანაზღაურება დააკისრა.

გათავისუფლებული თანამშრომელი, ანი შეროზია ამბობს, რომ დაითხოვეს, სავარაუდოდ, 20 ადამიანი: რესტავრატორები, არქეოლოგები, ხელოვნებათმცოდნეები, ისტორიკოსები და სხვა დარგის სპეციალისტები.

  • "კონკრეტულად ჩემზე რომ ვთქვა, 2016 წლიდან დღემდე, სააგენტოში (რომლის შემადგენლობაში 18 მუზეუმი და მუზეუმ-ნაკრძალია) ვიყავი არქეოლოგიური და ეთნოგრაფიული მასალების ერთადერთი რესტავრატორი", — წერს ის.
  • მისივე თქმით, გათავისუფლებულთა უმეტესობა აპირებს დავის დაწყებას უფლებების დასაცავად.

სააგენტოში ამბობენ, რომ 19 სექტემბერს დაწყებული ოპტიმიზაცია დასრულდა და შედეგად, "მართვის ეფექტიანობის გაზრდის მიზნით", ძეგლების რეგულარული ინსპექტირებისთვის მონიტორინგის სამსახურში შეიქმნა 5 რეგიონული დანაყოფი.

  • უწყება ამბოbს, რომ ანალიზის მიხედვით, სააგენტოს მონიტორინგის სამსახურის რესურსი საკმარისი არ არის როგორც დაგეგმილი ან/და მიმდინარე სარეაბილიტაციო სამუშაოების სრულყოფილი კონტროლის და რეგიონში ძეგლების რეგულარული ინსპექტირებისთვის, ამიტომ 26 ახალი შტატი დაამატეს.
  • აქვე იმასაც უსვამენ ხაზს, რომ სააგენტოს დაქვემდებარებულ მუზეუმებსა და მუზეუმ-ნაკრძალებს "მეტი ავტონომიურობა მიენიჭათ".
  • მხოლოდ განცხადების ბოლოს, სააგენტო ამბობს, რომ ცვლილებების შედეგად, "შტატით გათვალისწინებული თანამშრომლების რაოდენობა შეადგენს 268-ს, ნაცვლად 259 ერთეულისა, ხოლო შრომითი ხელშეკრულებით დასაქმებულ პირთა რაოდენობა, 172 პირის ნაცვლად, განისაზღვრა 150 ერთეულით" — რითიც 22 ადამიანის გათავისუფლებას ადასტურებს.
  • გარდა ამისა, სააგენტო ამტკიცებს, რომ ხელფასი მოემატა შტატით გათვალისწინებულ 24 პოზიციას (საშუალოდ, 350 ლარით) და შტატით გათვალისწინებულ არც ერთ პოზიციაზე თანამდებობრივი სარგო აღარ არის 1 000 ლარზე ნაკლები.