თბილისში, დოლიძეზე ბანკიდან გამოსული მოქალაქე დააყაჩაღეს. საქმეზე შინაგან საქმეთა სამინისტრომ გამოძიება დაიწყო. უწყებაში ყაჩაღობის სხვა დეტალებზე არ საუბრობენ.

საქმეზე გამოძიება სისხლის სამართლის კოდექსის 179-ე მუხლით მიმდინარეობს. ამ მუხლით, ყაჩაღობა ჩადენილი სიცოცხლისათვის ან ჯანმრთელობისათვის საშიში ძალადობით ანდა ასეთი ძალადობის გამოყენების მუქარით ისჯება თავისუფლების აღკვეთით ვადით ხუთიდან შვიდ წლამდე.

იგივე ქმედება, სადგომში ან სხვა საცავში უკანონო შეღწევით, ან ჯგუფურად, ან სატრანსპორტო საშუალების წინააღმდეგ ისჯება თავისუფლების აღკვეთით ვადით ექვსიდან ცხრა წლამდე.

მსგავსი ქმედება არაერთგზის, ან ბინაში უკანონო შეღწევით, ან დიდი ოდენობით ნივთის დაუფლების მიზნით ისჯება თავისუფლების აღკვეთით ვადით რვიდან თორმეტ წლამდე. იმ შემთხვევაში თუ ყაჩაღობა ორგანიზებული ჯგუფის მიერაა ჩადენილი ან იმის მიერ, ვინც ორჯერ ან მეტჯერ იყო ნასამართლევი სხვისი ნივთის მართლსაწინააღმდეგო მისაკუთრებისათვის ან გამოძალვისათვის ისჯება თავისუფლების აღკვეთით ვადით თერთმეტიდან თხუთმეტ წლამდე.