ინფორმაცია ცენტრალური კრიმინალური პოლიციის დეპარტამენტის დირექტორმა, თეიმურაზ კუპატაძემ ბრიფინგზე გაავრცელა.

რატომ არის მნიშვნელოვანი: ნარკოტიკების უკანონო რეალიზაციის, უკანონო გასაღების მცდელობისა და მომზადების ბრალდებით, გუშინ თბილისსა და რეგიონებში, მათ შორის, ფონიჭალის დასახლებაში, დაკავებულია 18 ნარკორეალიზატორი.

  • დანაშაულები 20 წლამდე ვადით ან უვადო თავისუფლების აღკვეთას ითვალისწინებს.

დეტალები: უწყების განცხადებით, ბრალდებულების მიერ მითითებული ლოკაციებიდან, ასევე, დაკავებულების პირადი ავტომანქანის და საცხოვრებელი სახლების ჩხრეკისას, ნივთმტკიცების სახით ამოღებულა სარეალიზაციოდ გამზადებული დიდი და განსაკუთრებით დიდი ოდენობით ნარკოტიკები და ფსიქოტროპული საშუალებები, ასევე, ნახევარ კილოზე მეტი კოკაინი.

  • დიდი ოდენობით ნარკოტიკული საშუალების უკანონო შეძენა შენახვისთვის დაკავებულია უკრაინის ერთი და რუსეთის ორი მოქალაქე.
  • განსაკუთრებით დიდი ოდენობით ნარკოტიკული საშუალებების და ფსიქოტროპული ნივთიერების უკანონო შეძენა-შენახვისათვის კი დაკავებულია 3 პირი.

გარდა ამისა, ნარკოტიკების ინტერნეტით უკანონო გასაღების ბრალდებით ყაზახეთის რესპუბლიკის 3 მოქალაქე დააკავეს.

  • შსს-ს განცხადებით, ნარკოტიკების გასაღებისთვის ბრალდებული პირები ჩართული იყვნენ ინტერნეტით ნარკოტიკების რეალიზაციის სქემაში.
  • მათი პირადი და საცხოვრებელი ბინების ჩხრეკისას ამოღებულია 2 კილოგრამამდე ნარკოტიკული საშუალება კოკაინი და ნახევარ კილოგრამზე მეტი ფსიქოტროპული საშუალება.