ყოფილი პრემიერმინისტრისა და ქართული ოცნების დამფუძნებლის გარემოცვის დასანქცირებას ოპოზიციაში ეხმაურებიან.

რატომ არის მნიშვნელოვანი: უკრაინამ ბიძინა ივანიშვილის ნათესავები, მათ შორის მისი ძმა და უჩა მამაცაშვილი დაასანქცირა.

  • შესაბამისი ბრძანება გუშინ, 19 ოქტომბერს უკრაინის პრეზიდენტის ადმინისტრაციის ვებგვერდზე გამოქვეყნდა და პერსონალური სპეციალური ეკონომიკური და სხვა შემზღუდავი ზომების (სანქციების) სიაში ცვლილებების შეტანას ითვალისწინებს.
  • ბრძანებას თან ახლავს დოკუმენტი სახელად "დამატება", სადაც ჩამოთვლილია სანქცირებული პირების სახელები და აღნიშნულია, რომ დოკუმენტი ძალაში შევიდა.

ენმ: მელიას განცხადებით, ზელენსკის ესა თუ ის გადაწყვეტილება, მით უფრო ესოდენ მნიშვნელოვანი გადაწყვეტილება ვერანაირად ვერ იქნება უსაფუძვლო და ეს მხოლოდ და მხოლოდ ეფუძნება კონკრეტულ ინფორმაციას, კონკრეტულ ფაქტებს.

  • "გვინახავს ბევრი რეკომენდაცია პრეზიდენტ ზელენსკის მხრიდან საერთაშორისო თანამეგობრობის მხრიდან, და ეს შეთავაზებები არასდროს დარჩენილად შეთავაზებებად და რეკომენდაციებად".
  • "რაც არ უნდა თქვას ივანიშვილის ოჯახის წევრებმა, რომ ისინი არ არიან პუტინის მოკავშირეები, ფაქტები მეტყველებენ, მათ წინააღმდეგ.
  • ამიტომ, პუტინის ყველა მოკავშირე, იქნება ეს ქვეყნის მმართველი თუ სხვადასხვა ბიზნესმენი მსოფლიოს დონეზე და მასშტაბით ექცევა მსოფლიოს სანქციების ქვეშ და დადგა ის დღე და ის წუთები, როდესაც ივანიშვილის ოჯახამდეც მოვიდა ეს კონკრეტული გადაწყვეტილება"

ლელო: სალომე სამადაშვილის განცხადებით, ეს არის პასუხი უკრაინის ხელისუფლების მხრიდან — "ჩვენ ვხედავთ, რომ მათ შორის ეკონომიკური მაჩვენებლები ადასტურებს, რომ დღეს, საქართველოს ტერიტორიაზე გამოყენება ხდება და ჩვენი ეკონომიკური ინფრასტრუქტურის რუსეთის მიერ, სანქციებისთვის თავის არიდების მიზნით".

  • "უკრაინას ამოძრავებს ერთადერთი ამოცანა, რომ ყველა ქვეყანამ, გააკეთოს ყველაფერი, რომ რუსეთს არ გაუადვილდეს სანქციების რეჟიმისთვის თავის არიდება", — ამბობს სამადაშვილი TV პირველთან.
  • მამუკა ხაზარაძეც ამბობს, რომ პროცესები მიდიოდა აქეთკენ — "ეს არის პრორუსული პოლიტიკის საწინააღმდეგოდ მიმართული ქმედება".

სტრატეგია აღმაშენებელი: გიორგი ვაშაძის განცხადებით, ეს არის ის გზა, რა სანქცირების გზასაც გადიან რუსეთის მოქალაქეები, რუსი ოლიგარქები და სხვა პირები.

  • მისი თქმით, ეს არის გზავნილი ივანიშვილისთვის — "უნდა გადაწყვიტოს, უნდა პუტინი თუ უნდა ცივილური სამყარო".
  • "ორმაგ თამაშს არავინ მიიღებს", — აცხადებს ვაშაძე TV პირველთან.

ევროპული საქართველო: გიგა ბოკერია ამბობს, რომ ეს გადაწყვეტილება უკრაინისგან მეტ-ნაკლებად მოსალოდნელი იყო.

  • "ეს არის დიდი სირცხვილი, რომელსაც მხოლოდ მაშინ ჩამოვირეცხავთ,
    როდესაც ამ რეჟიმს შევცვლით და გადავდგამთ სწორ ნაბიჯები".

დროა: ელენე ხოშტარიას განცხადებით, პროცესის ბოლო ივანიშვილის სანქცირებაა, მათ შორის არა მხოლოდ უკრაინის მხრიდან

  • მისი თქმით, სანქციები ყველა შემთხვევაში და ყოველთვის არის დასჯის და ზეწოლის პროცესი, კონკრეტული, დასაბუთებული ქმედებებისთვის.