პარიზის მოდის კვირეულის ფარგლებში Balenciaga-ს 2023 წლის გაზაფხულის კოლექციის ჩვენება თავისი ორიგინალურობით კვლავ მსოფლიოს ყურადღებას იქცევს. დემნას განცხადებით, ეს ყველაფერი გასული შოუს გაგრძელებაა, რომელიც კლიმატის ცვლილებასა და უკრაინის ომს ეძღვნებოდა და მოდელებს თოვლით დაფარულ პოდიუმსა და ხელოვნურ ქარბუქში უხდებოდათ სცენაზე გამოსვლა.

ფოტო: Balenciaga

ვინაიდან, დროთა განმავლობაში, ბუნებაშიც თოვლი ტალახად იქცევა, დემნამ გადაწყვიტა პოდიუმზეც იგივე გადაეტანა და ესპანელი ხელოვანის, სანტიაგო სიერას, დახმარებით ამჯერად ტალახით გაეფორმებინა სცენა. დამსწრე საზოგადოება ჩვენებაზე ხრწნის სუნსაც გრძნობდა, რომლის შესაქმნელად დემნასთან ხელოვანმა სისელ ტოლასმა ითანამშრომლა.

ფოტო: Balenciaga

ფოტო: Balenciaga

შოუ რეპერმა და დიზაინერმა, კანიე ვესტმა, გახსნა. მის, ისევე როგორც, ყველა მონაწილე მოდელის სახეს ემჩნეოდა "ცემის კვალი" (ამისთვის საათობით დასჭირდათ მაკიაჟის ოთახში დროის გატარება), ასევე მათი ტანსაცმელიც ძველისა და გაქუცულის შთაბეჭდილებას ტოვებდა. ამ ეფექტის შექმნას, დემნას თქმით, რამდენიმე დღე დასჭირდა, უფრო მეტი, ვიდრე უბრალოდ ძვირადღირებული სამოსის შექმნას სჭირდება ხოლმე.

ფოტო: Balenciaga

ფოტო: Balenciaga

დემნას ომთან და ლტოლვილობასთან პირადი გამოცდილება აკავშირებს. ათი წლის იყო, როცა ოჯახთან ერთად საქართველო დატოვა. მისი გამოწვევების ნაწილი იყო მისი სექსუალური ორიენტაციაც.

"ისე ვგრძნობდი თავს, თითქოს სახეში მირტყამდნენ, იმისთვის, თუ ვინ ვიყავი," იხსენებს დემნა. — "მაგრამ ფეხზე უნდა წამოდგე და გზა გააგრძლო. გაქვს რთული მისია, აღმოაჩინო, ვინ ხარ და ეს დაიცვა."

Balenciaga-ს უახლეს შოუს დემნამ "ძალიან ჩემეული შოუ" უწოდა.

"ბუნებით ოპტიმისტი ვარ, მაგრამ ახლა არ შემიძლია ძალიან ოპტიმისტი ვიყო," აღნიშნა მან. — "მგონია, რომ ეს შოუ თანაბრად გამოხატავს ამას — მუსიკა, გაფორმება, ყველაფერი მეტყველებს იმ დროზე, რომელშიც ვცხოვრობთ."