დემნა გვასალიამ 2015 წელს მოახერხა, მოდის ინდუსტრიაზე საკუთარი კვალი დაეტოვებინა, თუმცა მისი წლევანდელი ნამუშევარი დიზაინერის ინდივიდუალიზმს სულ სხვა სიმძლავრით გვაჩვენებს.

კვირას, Balenciaga-ს 2022 წლის შემოდგომის შოუზე მისულ სტუმრებს ადგილებზე ორი, დიდი ზომის მაისური დახვდათ — მაისურები უკრაინის დროშის ფერებში იყო და თან დიზაინერის მიერ დაწერილი წერილი ახლდა.

"უკრაინაში დაწყებულმა ომმა ის ტრავმა გამიღვიძა, რომელსაც 1993 წლიდან ვატარებ, იმ დროიდან, როცა იგივე მოხდა ჩემს ქვეყანაში და სამუდამოდ ლტოლვილი გავხდი. სამუდამოდ, რადგან ეს არის ტკივილი, რომელიც შენში უწყვეტად რჩება — შიში, სასოწარკვეთა და იმის გაცნობიერება, რომ მარტო ხარ. Სწორედ მაშინ მივხვდი, რა არის მნიშვნელოვანი ცხოვრებაში — თავად ცხოვრება, ჰუმანურობა, სიყვარული და თანაგრძნობა.

სწორედ ამიტომ გამიჭირდა ამ კოლექციაზე მუშაობა. ასეთ დროს მოდა კარგავს თავის აქტუალობას და არსებობის რეალურ უფლებას, ის თითქოს აბსურდულად გამოიყურება. ერთი წუთით ისიც ვიფიქრე, რომ გამეუქმებინა შოუ, რომელზეც მე და ჩემი გუნდი ამდენს ვმუშაობდით. შემდეგ მივხვდი, რომ ამ კვირეულის გაუქმება ნიშნავს დანებებას იმ ბოროტების წინაშე, რომელსაც უკვე თითქმის 30 წელია მტკივნეულად განვიცდი და მტკიცედ გადავწყვიტე, რომ საკუთარ ნაწილებს ეგოსა და უაზრო, უგულო ომის გამო აღარ დავთმობ.

მნიშვნელოვანია ავხსნა შოუს რეალური მიზანი — სინამდვილეში, ეს არის სიმამაცის, წინააღმდეგობის, სიყვარულისა და მშვიდობისათვის თავდადების ჩვენება"


დემნა საქართველოში დაიბადა, მაგრამ 1990-იანი წლების დასაწყისში, სამოქალაქო ომის დროს, ოჯახთან ერთად გაიქცა; ჯერ უკრაინაში ცხოვრობდნენ, შემდეგ — გერმანიაში. საქართველოს ისტორიასა და წარსულს დემნა აქამდეც გამოხმაურებია თავისი შემოქმედებით — მაგალითად, Vetements-ის 2019 წლის გაზაფხულის კოლექციით.

უკრაინაში განვითარებული მოვლენების ფონზე Balenciaga-ს 2022 წლის შემოდგომის კოლექცია კიდევ უფრო მნიშვნელოვანია და ახალ შუქზე გვიჩვენებს ამტანობისა და გამძლეობის, წინააღმდეგობისა და სიმამაცის იდეებს — გარდაქმნილს ტანსაცმელში.

ფოტო: Balenciaga

Balenciaga-ს ახალ შოუზე მოდელები ზამთრის ლანდშაფტში მოაბიჯებდნენ, რამაც საქართველოს მაცხოვრებლებს დევნილების მიერ გავლილი ჭუბერის გზა გაახსენა. დიდი ზომის ქურთუკები, ლაბადები — თავდაპირველად კოლექციას კლიმატის ცვლილებებისათვის უნდა გაესვა ხაზი. როგორც დემნამ ბრიტანულ Vogue-ს განუცხადა, იმის ჩვენება უნდოდა, რომ ადამიანები ამინდს ისე ვიღებთ, როგორც მოცემულობას, თუმცა 50 წელში შეიძლება კონკრეტული ამინდის გამოსაცდელად ხელოვნური გარემოს შექმნა დაგვჭირდეს, შემდეგ კი მისი ჩანაფიქრი სულ სხვა რამეში გადაიზარდა — როგორც ხდება ხოლმე.

Balenciaga ერთ-ერთი პირველი მსხვილი ბრენდი იყო, რომელიც უკრაინაში მიმდინარე კრიზისს გამოეხმაურა. მოდის სახლმა რამდენიმე დღის წინ ინსტაგრამიდან ყველა ფოტო წაშალა, მხოლოდ უკრაინის დროშა დატოვა. 2022 წლის შემოდგომის ჩვენება კი იმით გაიხსნა, რომ დემნამ უკრაინელი მწერლის, ალექსანდრე ოლესის ლექსი უკრაინულ ენაზე წაიკითხა.

"ომში მხოლოდ უდანაშაულო ადამიანები იღუპებიან. მე ამას განვიცდი და ჩემს გონებაში 30 წელი ვბლოკავდი, სანამ გასულ კვირას ახალი ამბების კითხვა დავიწყე", — განუცხადა მან ბრიტანულ Vogue-ს, — "ძველი ტკივილი მთელი სიმძაფრით დამიბრუნდა, ისევე როგორც ყველა იმ ადამიანს, ვისაც ეს გამოვლილი აქვს. ჩემი მესიჯი არის სიყვარული, ყოველთვის".

ამავე თემაზე: უკრაინის ომმა ჩემში ის ტკივილი გააღვიძა, რომელიც 1993 წლიდან მომყვება — დემნა გვასალია