იაპონური ფარმაცევტული კომპანიის Eisai მიერ მასაჩუსეტსში დაფუძნებულ Biogen-თან ერთად შექმნილმა პრეპარატმა ლაკანემაბმა ალცჰაიმერის მქონე პაციენტებში დაავადების პროგრესირება შეანელა. ეს პირველი მედიკამენტია, რომელმაც მასშტაბური კლინიკური ცდის საბოლოო ფაზაში მსგავსი შედეგი აჩვენა.

მონოკლონური ანტისხეულების შემცველი ლაკანემაბი მეორე პრეპარატია, რომელიც ზემოხსენებული კომპანიების თანამშრომლობით მავნე ცილების, ამილოიდების შესამცირებლად დამზადდა. ისინი ალცჰაიმერის მქონე ადამიანების ტვინში გვხვდება. მათ წინააღმდეგ ეფექტიანი მედიკამენტის შექმნას სხვა მეცნიერებიც ცდილობდნენ, თუმცა წარმატებას ვერ აღწევდნენ.

ფოტო: iStock

Eisai-ს კვლევა აშშ-ში, ჩინეთში, იაპონიასა და ევროპაში ჩატარდა. მასში მონაწილეობა 1 795 ადამიანმა მიიღო, რომელსაც დაავადების გამო კოგნიტიური პრობლემები სუსტი ფორმით აღენიშნებოდა და ამილოიდური დანალექებიც უფიქსირდებოდა. მათ ერთ ნაწილს ლაკანებამი 18 თვის განმავლობაში 2 კვირაში ერთხელ ეძლეოდა, სხეულის წონის ყოველ კილოგრამზე 10 მილიგრამი. მეორე ნაწილი კონტროლ ჯგუფი იყო და პლაცებოს იღებდა.

შედეგად, თერაპიამ პირველ ჯგუფში დაავადების პროგრესირება 25 პროცენტით შეანელა, რაც იმასაც ადასტურებს, რომ ალცჰაიმერის განვითარებაში ამილოიდებს მნიშვნელოვანი როლი აქვს. აღსანიშნავია, რომ პაციენტებში მწვავე გვერდითი ეფექტებიც გამოვლინდა, როგორიცაა ტვინის შეშუპება და სისხლდენა.

აშშ-ში მოქმედი მარეგულირებელი ორგანოების მიერ ამ პრეპარატის გამოყენების ნებართვის გაცემისთვის პროცესის დაჩქარება უკვე განიხილება. კომპანიები FDA-სგან დასტურის მიღებას 2023 წლის მარტამდე ელიან.

მანამდე კლინიკური ცდის შედეგების სრულად წარდგენა მომავალ თვეში ჩანიშნულ კონფერენციაზე იგეგმება, რასაც სამეცნიერო ნაშრომის გამოქვეყნებაც მოჰყვება.

თუ სტატიაში განხილული თემა და ზოგადად: მეცნიერებისა და ტექნოლოგიების სფერო შენთვის საინტერესოა, შემოგვიერთდი ჯგუფში – შემდეგი ჯგუფი.