როგორც ტელეგრამ არხი BAZA წერს, რუსეთის მოქალაქეები აცხადებენ, რომ საგზაო პოლიციის თანამშრომლებმა გამშვებ პუნქტზე გამგზავრების მსურველებისგან ქრთამის გამოთხოვნა დაიწყეს.

რატომ არის მნიშვნელოვანი: 21 სექტემბერს პუტინმა რუსეთში ნაწილობრივი მობილიზაცია გამოაცხადა — მას შემდეგ რუსეთის მოქალაქეები ქვეყნის დატოვებას ცდილობენ, საზღვრებთან და აეროპორტებში რამდენიმესაათიანი რიგებია.

• ნაწილი საქართველოში გამოქცევას ცდილობს — ლარსის გამშვები პუნქტთან რამდენიმე დღეა დაახლოებით 13-15-კილომეტრიანი საცობებია.

დეტალები: BAZA-ს ცნობით, თვითმხილველები აცხადებენ, რომ ჩრდილოეთ ოსეთში შესვლისას ავტობუსებს საგზაო პოლიცია აჩერებს და მძღოლებს თითო პასპორტზე 5 000 რუბლის შეგროვებას აიძულებენ. მოთხოვნის შეუსრულებლობის შემთხვევაში კი უარს ეუბნებიან.

• ვიდეოს მიხედვი, ხალხი ითხოვს, რომ არ აიღოთ ფული მოხუცებისგან მაინც, რადგან ისინი "აშკარად არ არიან პასუხისმგებელი სამხედრო სამსახურზე".
• გავრცელებულ ვიდეოში ქართული საუბარიც ისმის, მათ შორის, სიტყვები — "სანიკიძე ხომ მოგეცი", ასახელებენ რიცხვებსაც.
• მოგვიანებით, RBC-მ გაავრცელა ინფორმაცია, რომ ჩრდილოეთ ოსეთის შინაგან საქმეთა სამინისტრომ, FSB-სთან ერთად, საგზაო პოლიციის თანამშრომლების მიერ ქრთამის აღების ორი შემთხვევა გამოავლინა.
• "შესაძლებელი გახდა ხუთი თანამშრომლის გამოვლენა, რომლებმაც მოქალაქეებისგან უკანონოდ აიღეს 5-10 ათასი რუბლი. ჩართულ ინსპექტორებს შეუჩერდათ სამსახურებრივი უფლებამოსილება, ბრალის დამტკიცების შემთხვევაში ისინი სამსახურიდან გაათავისუფლებდნენ, ხელმძღვანელებს კი დისციპლინური პასუხისმგებლობა დაეკისრებათ", — აცხადებენ უწყებები.

რიცხვებში: შსს-მ გუშინ, 27 სექტემბერს გამოაქვეყნა მონაცემები. მობილიზაციის ამოქმედებამდე, საქართველოს საზღვარი ყველა გამშვები პუნქტიდან გადმოკვეთა და გადაკვეთა:

• 17 სექტემბერს: 6 986 — 7 406;
• 18 სექტემბერს: 6 606 — 6 743;
• 19 სექტემბერს: 6 411 — 6 782;
• 20 სექტემბერს: 5 603 — 6 199 პირმა.

მობილიზაციის გამოცხადების შემდეგ, მონაცემები გაზრდილია. მაგალითად, 21 სექტემბერს რუსეთიდან საზღვარი გადმოკვეთა 6 402-მა და გადაკვეთა 6 011-მა პირმა. დანარჩენ დღეებში შემოსულთა და გასულთა სტატისტიკა ასეთია:

• 22 სექტემბერს: 6 150 — 6 050;
• 23 სექტემბერს: 9 307 — 6 214;
• 24სექტემბერს: 9 330 — 6 249;
• 25 სექტემბერს: 11 143 — 5 519;
• 26 სექტემბერს: 10 804 — 4 947.