22 წლის მაჰსა ამინის გარდაცვალების შემდეგ ადამიანები მომხდარს სხვადასხვა ფორმით აპროტესტებენ. ბუნებრივია, ამ ფაქტს სოციალურ ქსელებშიც მოჰყვა გამოხმაურება. ბოლო დღეებია, TikTok-ზე მუსლიმი ქალები პროტესტის ნიშნად თმას იჭრიან და ჰიჯაბებს იხსნიან.

TikTok-ის ერთ-ერთ ვიდეოში, რომელიც უკვე თითქმის მილიონმა ადამიანმა ნახა, მუსლიმი ქალი შავ თავსაბურავს მაკრატლით იჭრის. "ზუსტად ორი წლის წინ დავიწყე ჰიჯაბის ტარება, დღეს კი მაჰსა ამინისთვის თმა შევიჭერი" — ვკითხულობთ ვიდეოს აღწერაში.

"მხარს ვუჭერ ჩემს მეგობარ ქალებს, რომლებიც ირანში ადამიანთა უფლებებისთვის იბრძვიან", — წერს ერთ-ერთი TikTok-ის მომხმარებელი და ისიც თმას იჭრის ვიდეოში, რომელიც უკვე 430 ათასმა ადამიანმა ნახა.

Watch on TikTok

აღსანიშნავია, რომ ზოგიერთი ტიკტოკერი ქალი, რომელიც არც ირანელია და არც მუსლიმი, პროტესტს შეუერთდა და თმის შეჭრის ვიდეოები თავადაც გაავრცელა. გარდა ამისა, მართალია, აქციები თავდაპირველად ირანში დაიწყო, მაგრამ დღეს მსოფლიოს სხვადასხვა ქვეყანაში აქტივისტები მაჰსა ამინის მკვლელობას აპროტესტებენ.

შეგახსენებთ, რომ 22 წლის ირანელი მაჰსა ამინი ე.წ. მორალის პოლიციამ "ჰიჯაბის ტარების წესის დარღვევისთვის" 13 სექტემბერს დააპატიმრა. თვითმხილველების თქმით, პოლიციის მანქანაში ჩასმის შემდეგ მაჰსას ფიზიკურად გაუსწორდნენ, მოგვიანებით კი ქალი გარდაიცვალა.

ასევე იხილეთ: