ქუთაისში, რუსთაველის გამზირზე, საქართველოს ბანკის ფილიალში თავდამსხმელი რამდენიმე საათის წინ შეიჭრა.

რატომ არის მნიშვნელოვანი: შსს-ს ინფორმაციით, შეიარაღებულ
პირს 12 მძევალი ჰყავს აყვანილი.

• ბანკიდან გავრცელებულ კადრებში ჩანს, რომ ის მძევლებს მისი მოთხოვნების გაჟღერებას, ამბის გავრცელებას აიძულებს და შესასრულებლად დროს იძლევა.
• მედიების ცნობით, მან მძევლები დაახლოებით 11 საათზე აიყვანა — დაზუსტებით რთულია იმის თქმა, როდის დაიწყო მოთხოვნების შესასრულებლად დროის ათვლა, თუმცა, სავარაუდოდ, ულტიმატუმის ვადა უკვე ამოიწურა.

თავდამსხმელს სამხედრო ფორმა აცვია და ნიღაბი უკეთია. კადრებში ჩანს, რომ მას სხეულზე და კარზე, სავარაუდოდ, ბომბები აქვს დამაგრებული, ასევე, მუხლთან აქვს დანა.

• მიუხედავად იმისა, რომ სახე დაფარული აქვს, ისმის მისი ხმა — ის ტერიტორიის დასატოვებლად სხვადასხვა ტრანსპორტს, ასევე, რუსეთის დროშას და ანკესს ითხოვს.

მძევლები: მათი რაოდენობის შესახებ შსს-მ ზუსტი ინფორმაცია 2 საათის წინ გაავრცელა. მედიებში გავრცელებული ცნობით, მათ შორის 2 ბანკის თანამშრომელია.

• მძევლებს უწევთ თქმა, რომ შენობაში ბომბია დამონტაჟებული და წამმზომია ჩართული.
• "როგორც კი კარი გაიღება, აფეთქდებაო", "კარზე არის დამონტაჟებული ბომბი, რომელიც აფეთქდება სადღაც საათსა და ათ წუთში და საათი და 30 წუთია დარჩენილი" — ისმოდა ვიდეოში შენობაში მყოფების ხმა.
• გარდა ამისა, ბოლო ფეისბუქლაივში ჩანს, რომ ერთ-ერთი მძევალი შეუძლოდ გახდა, ორი კი თავდამსხმელს შებოჭილი ჰყავს.

ერთ-ერთ ვიდეოში ჩანს, რომ ფანჯარასთან მიდიან პოლიციის ფორმაში ჩაცმული პირები, რომელთაც მძევალი მოუწოდებს, რომ წავიდნენ, რადგან როცა თავდამსხმელი სამართალდამცავებს ხედავს, მათ "ცუდად ექცევა".

• პასუხად პოლიციელი უხეში ტონით ეუბნება: "ქალბატონო, თქვენ გაჩერდით, დაწყნარდით, ძაან ბევრს ნერვიულობთ და დაწყნარდით".
• მან ამ რეპლიკით რამდენჯერმე მიმართა მძევალს, შემდეგ კი შენობაში მყოფ სხვა პირს უთხრა: "ეს ქალბატონი გააჩერეთ".

ოჯახის წევრები: ბანკის თანამშრომლისა და ერთ-ერთი მძევლის მამის თქმით, შვილთან სატელეფონო კომუნიკაცია მხოლოდ ერთხელ ჰქონდა.

• "დაგვირეკა, თავდამსხმელი შემოიჭრაო, მერე კომუნიკაცია საერთოდ არ გვქონია, გაითიშა".
• ერთ-ერთი მძევლის ცოლი ჰყვება, რომ ქმარი ბანკში ფულის გადასახდელად შევიდა. მისივე თქმით, კონტაქტზე ვერ გადის, რადგან ტელეფონი მანქანაში აქვს, ხოლო მანქანამდე არ უშვებენ.

თვითმხილველი: სოფო ნუცუბიძის თქმით ბანკში, შესვლისას თავდამსხმელი მის წინ მიდიოდა და მალევე გასროლის ხმა გაიგო.

• "გვერდით შევედი ავიაბილეთებში და თან იყო ავტომატურად გასროლა, ეგრევე ვინც მოასწრო გამოსვლა... ერთმა გოგომ მოასწრო და მერე დარეკეს პატრულში", — აღნიშნა მან.

შსს-მ დღის განმავლობაში ორი განცხადება გაავრცელა, თუმცა ამ დრომდე მომხდარს არ გამოხმაურებია შს მინისტრი, ვახტანგ გომელაური და არც შემთხვევის ადგილზე გამოჩენილა.

• ქართული ოცნებიდან პირველი მომხდარზე კომენტარი ირაკლი ქადაგიშვილმა გააკეთა და თქვა, რომ "ასეთი მოვლენები მთელ მსოფლიოში ხდება და მოხდა აქაც".

გამოძიება სისხლის სამართლის კოდექსის 144-ე, 236-ე, 323-ე და 329-ე მუხლებით დაიწყო, რაც გულისხმობს:

• მძევლად ხელში ჩაგდებას;
• საბრძოლო მასალის მართლსაწინააღმდეგო შეძენა/შენახვა/ტარებას;
  ტერორისტულ აქტს;
• ტერორისტული მიზნით მძევლად ხელში ჩაგდებას.

არქივიდან: ბოლო რამდენიმე წლის განმავლობაში ბანკში შეიარაღებული შეჭრისა და ყაჩაღობის მცდელობის არაერთი შემთხვევა დაფიქსირდა, მათი ნაწილი საქართველოს ბანკში იყო.

• ყველაზე გახმაურებული შემთხვევა ბადრი ესებუას უკავშირდება, რომელმაც ზუგდიდში მძევლები აიყვანა, რამდენიმე საათში კი მძევლებთან ერთად ბანკი დატოვა და გაიქცა.
• შემთხვევის შედეგად არავინ დაშავებულა, ესებუა კი თანხასთან ერთად მიიმალა — როგორც შს მინისტრი ყოველ ჯერზე ამბობს, მას ეძებენ.