შინაგან საქმეთა სამინისტროში აცხადებენ, რომ პირველადი ინფორმაციით, შეიარაღებული პირი შოთა რუსთაველის გამზირზე, საქართველოს ბანკში შეიჭრა.

რატომ არის მნიშვნელოვანი: მედიები თვითმხილველებზე დაყრდნობით ავრცელებენ ინფორმაციას, რომ ბანკში მძევლები არიან.

  • გარდა ამისა, სოციალურ ქსელში ვრცელდება პირდაპირ ეთერში გადაღებული ვიდეოები, რომელიც, სავარაუდოდ, ბანკში არსებულ სიტუაციას ასახავს.
  • სხვადასხვა კადრის მიხედვით, სამხედრო ფორმაში ჩაცმული თავდამსხმელი მძევლებს ვიდეოს გადაღებას აიძულებს, მის მოთხოვნებს აჟღერებინებს და შესასრულებლად დროს იძლევა, თუმცა რთულია იმის თქმა, როდის დაიწყო მან ათვლა.
  • ამასთან, ის მძევლებს ეუბნება, რომ ბანკის კარზე დამაგრებულია ბომბები — ამ ეტაპზე შსს-ს ვიდეოებზე არ უსაუბრია.

დეტალები: უწყების თქმით, ბანკთან სამართალდამცავები არიან მობილიზებულები და მიმდინარეობს საჭირო პროცედურები.

  • შსს მედიის წარმომადგენლებსა და მოქალაქეებს მოუწოდებს, დაიცვან უსაფრთხოების ნორმები და დაემორჩილონ ადგილზე პოლიციელთა მითითებებს.

არქივიდან: ბოლო რამდენიმე წლის განმავლობაში ბანკში შეიარაღებული შეჭრისა და ყაჩაღობის მცდელობის არაერთი შემთხვევა დაფიქსირდა, მათი ნაწილი საქართველოს ბანკში იყო.

  • ყველაზე გახმაურებული შემთხვევა ბადრი ესებუას უკავშირდება, რომელმაც ზუგდიდში მძევლები აიყვანა, რამდენიმე საათში კი მძევლებთან ერთად ბანკი დატოვა და გაიქცა.
  • შემთხვევის შედეგად არავინ დაშავებულა, ესებუა კი თანხასთან ერთად მიიმალა — როგორც შს მინისტრი ყოველ ჯერზე ამბობს, მას ეძებენ.