ამ ეტაპზე უცნობია, რამ გამოიწვია დაძაბულობა. სომხური მედიები ამბობენ, რომ აზერბაიჯანი მათ ქალაქებს ბომბავს. აზერბაიჯანული წყაროები კი წერენ, რომ სომხეთმა "პროვოკაცია მოაწყო".

რატომ არის მნიშვნელოვანი: 2020 წლის 10 ნოემბერს, 40-დღიანი ომის შემდეგ, სომხეთმა, აზერბაიჯანმა და რუსეთმა სამშვიდობო შეთანხმებას მოაწერეს ხელი, რომლის მიხედვითაც სომხეთს აზერბაიჯანისთვის ტერიტორიების გადაცემა მოუწია, ხოლო ლაჩინში შეიქმნა დერეფანი, სადაც "რუსი სამშვიდობოები" განლაგდნენ.

  • ამის შემდეგ ცეცხლის შეწყვეტის შეთანხმება არაერთხელ დაირღვა და სხვადასხვა მონაცემით, მეორე ომის დასრულების შემდეგ, რამდენიმე ასეული ადამიანი დაიღუპა.
  • დღეს გავრცელდა ინფორმაცია, რომ დილით აზერბაიჯანულმა მხარემ ცეცხლი გაუხსნა მთიან ყარაბაღის ორ დასახლებას — კარმირ შუკასა და თაღავარდს.
  • თავის მხრივ, აზერბაიჯანის თავდაცვის სამინისტრო ამტკიცებს, რომ სომხეთის შეიარაღებული ძალები რამდენიმე დღეა აზერბაიჯანის პოზიციების მიმართულებით ისვრიან, რასაც სომხეთის უარყოფს.

დეტალები: ადგილობრივი და საერთაშორისო მედიები, მათ შორის რადიო თავისუფლების სომხური ბიურო ავრცელებს სომხეთის თავდაცვის სამინისტროს მდივნის განცხადებას.

  • "13 სექტემბერს, 00:05 საათზე, აზერბაიჯანის შეიარაღებული ძალების ქვედანაყოფებმა საარტილერიო საშუალებებიდან და მსხვილკალიბრიანი შაშხანებიდან ინტენსიურად სროლა დაიწყეს სომხეთის პოზიციებზე გორის, სოტკისა და ჯერმუკის მიმართულებით", — განაცხადეს უწყებაში.
  • აზერბაიჯანული მედიები კი თავდაცვაზე დაყრდნობით წერენ, რომ ინფორმაცია, თითქოს სომხეთში სამოქალაქო ინფრასტრუქტურა დაიბომბა, სიმართლეს არ შეესაბამება.
  • ვრცელდება ვიდეოებიც, რომლებიც ამ ტერიტორიებზე სროლებს ასახავს.

გარდა ამისა, რადიო თავისუფლების სომხური ბიურო წერს, რომ სომხეთ-აზერბაიჯანის საზღვარზე მყოფი რამდენიმე თემის, მათ შორის სიუნიკის, ვაიოც ძორისა და გეღარქუნიკის რეგიონის მცხოვრებლები სროლისა და დაბომბვის შესახებ იტყობინებიან.

  • გამოცემას სოფელ ვერინ შორჟას გამგებელმა განუცხადა, რომ აზერბაიჯანის არმიამ "ინტენსიური ცეცხლი გახსნა".
  • მათივე ინფორმაციით, ადგილობრივი მედია საკუთარ წყაროებზე დაყრდნობით იუწყება ფართომასშტაბიანი შეტაკებები ლაჩინსა და ქელბაჯარის რაიონებში.
  • აზერბაიჯანული ოფიციალური წყაროები საზღვრიდან ამ დრომდე ინფორმაციას არ ავრცელებენ.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება მსოფლიოში.