საბავშვო ხელსახოცების სატვირთო ავტომობილს, რომელიც აშშ-მექსიკის საზღვარზე შეამოწმეს, 11,8 მილიონი დოლარის ღირებულების კოკაინი გადაჰქონდა. ნარკოტიკულ საშუალება აშშ-ის ოფიცრებმა გასულ ორშაბათს ტეხასის შტატისა და მექსიკის სასაზღვრო პუნქტზე ამოიღეს.

სატვირთო ავტომობილის მძღოლი თავდაპირველად ამტკიცებდა, რომ საბავშვო ხელსახოცები გადაჰქონდა და პირველ შემოწმებაზე პოლიციამ საეჭვო ვერაფერი აღმოაჩინა. თუმცა ტვირთი ხელმეორედ შეამოწმეს, რაშიც გაწვრთნილი ძაღლებიც ჩაერთო და 11,8 მილიონის ღირებულების კოკაინიც იპოვეს.

ფოტო: CNN

"ოფიცრები, რომლებიც საზღვარს იცავენ, ქვეყნის უსაფრთხოებაზე საეჭვო ტვირთის შემოწმებითა და ნარკოტიკული საშუალებების ამოღებით ზრუნავენ. ეს შემთხვევა კიდევ ერთი მაგალითია, თუ როგორ გვეხმარება სასაზღვრო უსაფრთხოების დეპარტამენტი იმაში, რომ ნარკოტიკული საშუალებების ჩვენს ქვეყანაში გავრცელება თავიდან ავირიდოთ", — განაცხადა სასაზღვრო პორტის დირექტორმა, ალბერტო ფლორენსმა.

ადგილობრივი პოლიციის შეფასებით, ბოლო 20 წლის განმავლობაში ეს ამოღებული კოკაინის ყველაზე დიდი რაოდენობაა. რაც შეეხება საბავშვო ხელსახოცების სატვირთოსთან კოკაინის კავშირს, ამ ეტაპზე გამოძიება გრძელდება.