ქართული ოცნების ყოფილმა დეპუტატებმა მორიგი ანტიდასავლური წერილი გამოაქვეყნეს. წინა განცხადებების მსგავსად, აქაც აშშ-ის სალჩოს ესხმიან თავს, თუმცა ამჯერად, წასული ოთხეული საელჩოს მიერ პარლამენტისთვის სასამართლო რეფორმის შესახებ წარდგენილ დოკუმენტზე საუბრობს.

რატომ არის მნიშვნელოვანი: პარტიიდან წასვლის შემდეგ მიხეილ ყაველაშვილი, დიმიტრი ხუნდაძე და სოზარ სუბარი ანტიდასავლურ ნარატივებს აჟღერებენ. მათ მოგვიანებით შეუერთდა გურამ მაჭარაშვილიც. ისინი უკვე არაერთხელ დაესხნენ თავს ამერიკის შეერთებული შტატების ელჩს.

• 21 ივლისს ნედ პრაისმა თქვა, რომ დეზინფორმაცია და პერსონალური თავდასხმები არ შეესაბამება იმას, თუ როგორ ურთიერთობენ პარტნიორები ერთმანეთთან.
• ამის შემდეგ წასულებმა ნედ პრაისსაც ანტიდასავლური წერილი მისწერეს და ელჩი აკრიტიკეს.

დეტალები: დეპუტატების თქმით, დოკუმენტში სიტყვა "უნდა" 60-ჯერ არის გამოყენებული, ხოლო საელჩო პარლამენტს "რეკომენდაციას" კონკრეტულ საკითხებზე მხოლოდ 9-ჯერ უწევს.

• მათი შეფასებით, ეს საქართველოს სუვერენიტეტისა და სახელმწიფო ინსტიტუტების მიმართ "სრულიად უპატივცემულო და უხეშ დამოკიდებულებას" აჩვენებს.
• "ასეთ დოკუმენტს არა "რეკომენდაციები", არამედ მხოლოდ „ინსტრუქცია“ შეიძლება ეწოდოს, რაც, სამწუხაროდ, საბჭოთა წარსულს გვახსენებს და შესაბამის მძიმე ასოციაციებს აღძრავს".

"მანკიერი პრაქტიკა": ოცნებიდან წასულები აცხადებენ, რომ სამუშაო ჯგუფებში საელჩოს წარმომადგენლების დასწრება და კანონშემოქმედებით პროცესში მონაწილეობის მიღება "მანკიერი პრაქტიკაა".

• დეპუტატების აზრით, სუვერენულ სახელმწიფოში ასეთი პრაქტიკა სრულიად მიუღებელია, როგორი სტრატეგიულიც არ უნდა იყოს პარტნიორობა ორ სახელმწიფოს შორის.
• ისინი ირწმუნებიან, რომ გააკეთებენ ყველაფერს, რათა ამგვარი პრაქტიკა სამომავლოდ მაინც აღიკვეთოს და კანონები, "დემოკრატიისა და სახალხო სუვერენიტეტის პრინციპების შესაბამისად", მხოლოდ იმ სახელმწიფო ინსტიტუტების წარმომადგენლების მიერ დაიწეროს, რომლებსაც შესაბამისი ლეგიტიმაცია საქართველოს კონსტიტუციის საფუძველზე აქვთ მინიჭებული.

საელჩოს დოკუმენტი: მმართველი პარტიის ყოფილი წევრები ამბობენ, რომ საელჩო პარლამენტისგან ხუთი კონსტიტუციური ნორმის შეცვლას "ითხოვს".

• "ამასთან, საუბარია ნორმებზე, რომლებიც ვენეციის კომისიის მიერ უკვე არის სამართლიანად და უხარვეზოდ შეფასებული. ესეც არის სახელმწიფოს მიმართ უპატივცემულო და უხეში დამოკიდებულების გამოვლინება";
• "როდესაც საელჩო გამუდმებით ცდილობს, საქართველოს პარლამენტს საქართველოს კონსტიტუციაში ცვლილებების შეტანა აიძულოს, ეს კიდევ ერთხელ გვაფიქრებინებს, რომ საელჩოსთვის სახელმწიფოს სტაბილურობის შესუსტება ერთგვარი თვითმიზანია".

წასულები ყურადღებას ამახვილებენ სამ ინსტრუქციაზე, მათ შორის, მოსამართლეთა არჩევისა და დანიშვნისას კვალიფიციური უმრავლესობის წესის გამოყენებაზე, სასამართლოების თავმჯდომარეების არჩევითობასა და უზენაესი სასამართლოს სამი მოსამართლის უვადოდ გადანიშვნაზე.

• ისინი აცხადებენ, რომ ეს ყველაფერი ადასტურებს მათ დასკვნას, რომ "სასამართლოს დამოუკიდებლობის ხელყოფა საელჩოსთვის ერთ-ერთი უმთავრესი პრიორიტეტია";
• "საზოგადოება გასული სამი წლის განმავლობაში, ძირითადად, საელჩოს ორ მცდელობას აკვირდებოდა: პირველი, ეს იყო ხალხის ნების წინააღმდეგ ხელისუფლების შეცვლა და ხელისუფლებაში ნაციონალური მოძრაობის დაბრუნება და მეორე, იმავე ნაციონალური მოძრაობის მეშვეობით, სასამართლო სისტემაში შეღწევა".

მეტიც, დეპუტატები აშშ-ის საელჩოს წინააღმდეგ მიმართ წერილში ამტკიცებენ, რომ "სასამართლოს დამოუკიდებლობის ხელყოფისა და მასში შეღწევის მიზანს" საელჩოს მიერ იუსტიციის უმაღლესი საბჭოს "სრული იგნორირება" და მოსამართლეების მიმართ "შერჩევითი" მიდგომაც ადასტურებს.

• "კლანური პრინციპების შესაბამისად, საელჩოს შერჩეული ყავს ათამდე ფავორიტი მოსამართლე, რომლებიც ვიზიტების, ტრენინგებისა და სემინარების დაგეგმვისას განსაკუთრებული პრივილეგიებით სარგებლობენ";
• "ზოგადად, აღნიშნული ღონისძიების ორგანიზებისა, რაც იუსტიციის უმაღლესი საბჭოს გვერდის ავლით ხორციელდება, იკვეთება დისკრიმინაციული მიდგომა, რომლის უკან ფავორიტი მოსამართლეების წრის შენარჩუნებისა და გაფართოების ინტერესი იკითხება";
• "აღნიშნულის გაგრძელებაა ელჩის მოულოდნელი და შეუთანხმებელი ვიზიტები სასამართლოებში, რომლებიც, ბუნებრივია, ზუსტად იგივე მიზანს ემსახურება".

დეპუტატები აშშ-ის საელჩოს ხელისუფლებაზე "შეტევაშიც" ადანაშაულებს და აცხადებს, რომ ეს ტომას ილვესის "პირით გაახმოვანეს".

• აქ ისინი კვლავ იმეორებენ ნარატივს, რომ ცალკეულ პირებს საქართველოს ომში ჩათრევა უნდა და მსგავსი განცხადების გაკეთებაში ტომას ილვესსაც სდებენ ბრალს.
• "ნაცვლად იმისა, რომ ჩვენს განცხადებაზე საელჩოს ჯანსაღი რეაქცია ჰქონოდა, ახლა ისინი ქვეყანას, სანქცირებული საქონლით ვაჭრობის მოგონილი საბაბით, უკვე საერთაშორისო იზოლაციით ემუქრებიან";
• "როგორც ჩანს, ჩვენს მიერ საელჩოსთვის ნიღბის ჩამოხსნამ და სიმართლის თქმამ მათი გაღიზიანება გამოიწვია. შესაბამისად, როგორც ხელისუფლებას, ისე საზოგადოებას მართებთ მაქსიმალური სიფრთხილე, რათა ქვეყანამ შესაბამისი რისკები აიცილოს თავიდან".