დავიწყოთ იმით, რომ ირაკლი ღარიბაშვილი და სამთავრობო გუნდი, აგვისტოს ომის მე-14 წლისთავთან დაკავშირებით, მუხათგვერდის ძმათა სასაფლაოზე არა 7, არამედ 8 აგვისტოს ავიდნენ.

რატომ არის მნიშვნელოვანი: 8 აგვისტო რუსული პროპაგანდისთვის ერთგვარი იარაღია — ცდილობენ დაამტკიცონ თითქოს სწორედ ამ დღეს საქართველომ დაიწყო სამხედრო აგრესია საკუთარ ტერიტორიაზე და თავად შემდეგ ჩაერთვნენ "ხალხის დასაცავად".

• სინამდვილეში, რუსეთის რეგულარული არმია საქართველოში 7 აგვისტოს შემოიჭრა.
• საერთაშორისო თანამეგობრობა სწორედ 7 აგვისტოს ავრცელებს განცხადებებს, რომლითაც რუსულ აგრესიას გმობს, 8 რიცხვს კი რუსეთის და საქართველოს მთავრობები უსვამენ ხაზს.

დეტალები: კითხვაზე, რატომ იმეორებენ რუსულ პროპაგანდას და რატომ მიიჩნევენ ომის დასაწყისად 8 აგვისტოს, პრემიერმა თქვა, რომ სამწუხაროა, როცა თარიღებზე უწევთ საუბარი.

• "ჩვენ ყველანი დღეს ვართ შეკრებილი იმისთვის, რომ კიდევ ერთხელ ქედი მოვიხაროთ ჩვენი გმირების წინაშე, დანარჩენ თარიღებზე საუბარს და სპეკულაციებს მე გთხოვთ ყველას, რომ თავი დავანებოთ".
• იმავე თემაზე კითხვების გამეორების შემდეგ ღარიბაშვილმა ხაზი გაუსვა, რომ წინა ხელისუფლების წარმომადგენლებიც ამ რიცხვში აღნიშნავდნენ და ჟურნალისტებს მისცა შენიშვნა, რომ გმირი სამხედროების ოჯახის წევრების წინ ამაზე საუბარი უხერხულია.

თუმცა, პრემიერმინისტრს არ ეუხერხულა მათ წინ ესაუბრა იმაზე, რომ აგვისტოს ომი საქართველოს ხელისუფლების მიერ იყო პროვოცირებული. მან ისე წარმოაჩინა, თითქოს რუსეთი არ შემოიჭრებოდა საქართველოში, რომ არა მიხეილ სააკაშვილი — ეს მაშინ, როცა ოკუპანტი ქვეყანა წლებით ადრე გეგმავდა ინტერვენციას.

• "მთავარი რაც არის, არის შემდეგი, თქვენი ტელევიზიების დე ფაქტო მფლობელის, ყოფილი პრეზიდენტი სააკაშვილის უგუნურმა პოლიტიკამ, მისმა გაუთვლელმა პროვოკაციულმა ნაბიჯებმა განაპირობა ის, რომ მათ თავიდან ვერ აიცილეს ეს ტრაგიკული ომი".
• "ეს იყო სააკაშვილის და მისი გუნდის ღალატი. მათ გაწირეს ჩვენი ქვეყანა, გაწირეს ჩვენი ხალხი, ჩვენი სამხედროები".

ღარიბაშვილმა არ უპასუხა კითხვას — როდის დავკარგეთ აფხაზეთი. მის ფეისბუქპოსტთან დაკავშირებით ჟურნალისტების ინტერესიც პრემიერმინისტრმა პროვოკაციად შეაფასა.

• შეგახსენებთ, რომ პოსტში მან აფხაზეთისა და სამაჩაბლოს ოკუპაციის თარიღები გააერთიანა და დაწერა, თითქოს ისინი მხოლოდ 14 წლის წინ დავკარგეთ.
• "14 წელია ჩვენი ქვეყნის გული — სამაჩაბლო, ცხინვალის რეგიონი და აფხაზეთი რუსეთის მიერ არის ოკუპირებული", — წერდა ის.
• 14 წლის წინ, აგვისტოს ომის შემდეგ რუსეთმა ოკუპირებული რეგიონების დამოუკიდებლობა აღიარა.
• თუმცა აფაზეთის ომისა და სოხუმის დაცემის შემდეგ, 90-იანი წლებიდან სწორედ რუსეთის მართული სეპარატისტული ჯგუფები მართავდნენ აფხაზეთს დე ფაქტოდ, ასევე, ოკუპირებულ ტერიტორიებზე იდგა რუსული დანაყოფები.

რეალურად, არაერთი ავტორიტეტული საერთაშორისო ორგანიზაციის, რუსული, ქართული და საერთაშორისო მედიების არქივები და რუსი მაღალჩინოსნების განცხადებები მოწმობს, რომ საქართველოს წინააღმდეგ ომი დიდი ხნით ადრე იგეგმებოდა.

• მაგალითად, პუტინმა თავადვე თქვა, რომ საქართველოსთან ომის გეგმა რუსულმა გენშტაბმა მოამზადა 2006 წლის ბოლოს და 2007 წლის დასაწყისში. ამ გეგმის პრაქტიკული განხორციელება კი მოსკოვმა 2008 წელს გადაწყვიტა.
• გარდა ამისა, პრეზიდენტ სააკაშვილის ჩვენებით, ჯერ კიდევ თებერვალში პუტინი დაემუქარა, რომ კოსოვოს დამოუკიდებლად აღიარების გამო დასავლეთს "აფხაზეთისა და სამხრეთ ოსეთის საკითხით" უპასუხებდა.
• ამას მოწმობს რუსეთის გადადგმული სხვა ნაბიჯებიც, მაგალითად: 2008 წლის 21 მარტს, რუსეთის სახელმწიფო დუმამ მიიღო რეზოლუცია, რომელიც მთავრობას მოუწოდებდა, განეხილა საქართველოს ორი რეგიონის დამოუკიდებლობის აღიარების შესაძლებლობა.
• აპრილიდან რუსეთმა სხვადასხვა ფორმით სეპარატისტულ რეგიონებში რუსული დანაყოფების გაძლიერება და იარაღის შეგზავნა დაიწყო.
• თუ გაინტერესებს, კიდევ რა წყაროებით დასტურდება, რომ შვიდ აგვისტოს რუსული არმია საქართველოში იყო, წაიკითხეთ ჩვენი სტატია.