ლუდის მოყვარულებს Heineken-მა ახალი და უცნაური სიურპრიზი გაუკეთა. ლუდის მწარმოებელმა კომპანიამ ახალი სპორტული ფეხსაცმელი, სახელად Heinekicks, გამოუშვა, რომელიც ნამდვილ ლუდს შეიცავს. ფეხსაცმლის მომავალმა მფლობელებმა იციან, რომ ლუდი ყოველთვის თან აქვთ.

Heinekicks-ის ძირებში ნამდვილი ლუდი ასხია და ფეხსაცმლის შესაქმნელად ცნობილი დიზაინერები დაიქირავეს. გარდა ამისა, Heineken-ის მიერ შექმნილი ფეხსაცმელი იმითაც არის განსაკუთრებული, რომ ორივე წყვილს ლითონის ბოთლის გასახსნელიც აქვს მიმაგრებული. ასე რომ, Heinekicks-ის მფლობელებს ნებისმიერ ადგილზე ლუდის შეძენა და შემდეგ გახსნა თავადაც შეუძლიათ.

ფოტო: Heineken

ფეხსაცმლის დიზაინი ძირითადად Heineken-ის ბოთლის ფერებისგან შედგება. დიზაინერებმა მწვანე და წითელი ფერები გამოიყენეს, ასევე ფეხსაცმლის ძირებში ლუდი სპეციალური მეთოდის გამოყენებით შეიყვანეს და მომხმარებელს მისი დანახვაც შეუძლია.

ჯერჯერობით მხოლოდ 32 წყვილი Heinekicks-ია გამოშვებული, თუმცა რა ფასად გაიყიდება სპორტული ფეხსაცმელი, ამ ეტაპზე უცნობია.