ამერიკელმა კადიჯა ჯექსონ ბეიკერმა რამდენიმე კვირის უკან იქორწინა და ამის აღსანიშნავად რამდენიმე ტიკტოკ ვიდეოც გადაიღო. თუმცა, პლატფორმაზე მხოლოდ სულ ცოტა ხნის წინ გახდა პოპულარული — მას შემდეგ, რაც ინტერნეტმომხმარებლები მისმა ვარცხნილობამ აღაფრთოვანა.

საქმე ისაა, რომ კადიჯამ გადაწყვიტა, თავისი ქორწილისთვის თმა არ შეეღება და ცერემონიაზე ბუნებრივი ჭაღარით გამოჩენილიყო. ტიკტოკზე ვიდეოები ახალდაქორწინებული ქალის ვიზაჟისტმა, ტია კოდრინგტონმა, განათავსა.

"მისი ბუნებრივად ჭაღარა თმა მომწონდა", — დაწერა კოდრინგტონმა ვიდეოს აღწერაში, — "ასეთი თმა 16 წლის ასაკიდან აქვს".

გამომწერებისა და უცნობი ადამიანების გულწრფელად აღტაცებულმა გამოხმაურებამაც არ დაახანა. ტიას ვიდეომ პლატფორმაზე მალე მილიონზე მეტი ნახვა დააგროვა — მაყურებლები აღაფრთოვანა არა მხოლოდ ვიზაჟისტის ნამუშევარმა, არამედ იმანაც, თუ როგორ მოიხდინა კადიჯამ თავისი ბუნებრივი თმა.

@mua_ttt_tia I love the girls that stick to their roots 😍 #fyp #blacklove #bridalmakeup #bridetiktok #blackbridesoftiktok ♬ original sound - Tia Codrington

კოდრინგტონის თქმით, თავდაპირველად მისი მიზანი მხოლოდ ის იყო, ახალდაქორწინებულის სილამაზე გამომწერებისთვის გაეზიარებინა, თუმცა, მომხმარებლის გამოხმაურება მისთვის უფრო მნიშვნელოვანი გახდა.

"შესანიშნავი ამბავია, როცა იაზრებ, რომ მას შეეძლო, ამ დღისთვის თმის ფერი შეეცვალა ან სხვა რამ ეცადა, მაგრამ ამჯობინა, საკუთარი თავი ყოფილიყო და თმის ბუნებრივი ფერი მოეხდინა", — ამატებს ტია.

ტიკტოკის მომხმარებლების გამოხმაურებამ ახალდაქორწინებულიც აღაფრთოვანა. კადიჯა, რომელიც აქამდე არცერთ სოციალურ ქსელში არ ყოფილა დარეგისტრირებული, ამბობს, რომ მისთვის მნიშვნელოვანი იყო, ქორწილის დღეს თავისი ნამდვილი სტილი და პიროვნულობა წარმოეჩინა.

"ასეთ გამოხმაურებას არ ველოდი, რადგან სარკეში ყოველდღე ვიხედები და არ ვფიქრობ, რომ განსაკუთრებული ამბავია, თუკი შენს ბუნებრივ თმასა და გარეგნობას იღებ", — ამბობს ბეიკერი.

ვიზაჟისტი კი აღნიშნავს, რომ მისთვის ინსპირაცია სწორედ კადიჯას ბუნებრიობა იყო და ამიტომ ეცადა, მისთვის შესაფერისი მაკიაჟი გაეკეთებინა.

"ჭაღარა თმა ძალიან ლამაზია, ამდენად აუცილებელი იყო, შესაბამისი ფერთა პალიტრა შემერჩია", — აცხადებს იგი.

@mua_ttt_tia And she wore that hair 🤌🏾 #fyp #PrimeDayDreamDeals #weddingtiktok #bridalhairstyle #bridaltiktok #blackbride ♬ Surprise - Chlöe

თავად ბეიკერი იხსენებს, რომ თმის გაჭაღარავება 20 წელზე მეტი ხნის წინ დაეწყო. თავიდან, წლების განმავლობაში, იგი თმას იღებავდა, რადგან მიაჩნდა, რომ ჭაღარა მხოლოდ მოხუცებს ჰქონდათ, 30 წლის ასაკზე უმცროსი ქალებისთვის კი მიუღებელი იყო.

თუმცა, შვიდი წლის წინ, გადაწყვიტა, საკუთარი თავი ბუნებრივად მიეღო და თმა აღარ შეეღება. კადიჯას თქმით, ამის შემდეგ მას სულ ეკითხებიან, სად და რა ფერით შეიღება თმა.

"ეს ჩემი თმის ბუნებრივი ფერია", — ასეთია მისი პასუხი ყოველთვის.

ახალდაქორწინებული იმედოვნებს, რომ მისი გადაწყვეტილება სხვებსაც შთააგონებს, საკუთარი თავი თავდაჯერებულად მიიღონ.

"იყო საკუთარი თავის საუკეთესო ვერსია საუკეთესო რამ არის, რაც მსოფლიოს შეგიძლია აჩუქო", — დასძენს კადიჯა.

ასევე იხილეთ: