პლატფორმა "ინიციატივის" და არასამთავრობო ორგანიზაცია "აქტიური ცხოვრება ჩემი სტიქიას" ერთობლივი ღონისძიება გაიმართა. ღონისძიებას კომპანია აჭარაბეთის სათავო ოფისმა უმასპინძლა.

ღონისძიებას ესწრებოდნენ არასამთავრობო ორგანიზაციის წევრები, მათ შორის საქართველოს სხვადასხვა რეგიონში მცხოვრები სამშვიდობო მისიის წევრები, საომარ მოქმედებაში მონაწილე სამხედრო მოსამსახურეები, ომის ვეტერანები, შეზღუდული შესაძლებლობების მქონე პირები და პარასპორტსმენები.

ფოტო: ინიციატივა

ღონისძიებაზე მოეწყო მხედველობის არ მქონე ადამიანების ნამუშევრების გამოფენა, ასევე ელექტრო და მექანიკური ეტლების საგამოფენო კუთხე, რომელიც საქართველოში შშმ პირების მიერ მზადდება.

აღნიშნული ღონისძიების მიზანი დამსწრე ადამიანებისთვის დამატებითი შესაძლებლობების გაჩენა და მათი კიდევ უფრო მეტი ინტეგრაციაა სოციალურ ცხოვრებასა თუ კონკრეტულ აქტივობებში.

"ძალიან გვიხარია, რომ დღეს აჭარაბეთის სათავო ოფისი არის ამ ღონისძიების მასპინძელი. პლატფორმა “ინიციატივა” აქტიურად უჭერს მხარს პარასპორტსმენებს და მათთვის საჭირო ინიციატივებს. დღეს კი ორმაგად სასიხარულოა მათი სტუმრობა. ვფიქრობთ, სწორედ მსგავსი ინიციატივებით შესაძლებელია ადამიანების ცხოვრება უკეთესობისკენ შევცვალოთ, ამავე დროს მივცეთ შესაძლებლობა წარმოაჩინონ საკუთარი შესაძლებლობები და ასევე გახდნენ მაგალითი სხვა ადამიანებისთვის", — განაცხადა აჭარაბეთის საზოგადოებასთან ურთიერთობის დეპარტამენტის ხელმძღვანელმა, ნინო გუჯაბიძემ.

ფოტო: ინიციატივა

"დიდი მადლობა მინდა გადავუხადო პლატფორმა "ინიციატივას" და აჭარაბეთის სათავო ოფისს, რომ გვიმასპინძლა და გაახარა ჩვენი პროექტის მონაწილეები. პლატფორმა "ინიციატივა" აქტიურად უჭერს მხარს პარასპორტსმენებს და შშმ პირებს და მათთვის საჭირო ინიციატივებს. ორმაგად სასიხარულოა მათი ინიციატივით ჩვენი სტუმრობა. ღონისძიებაზე გვქონდა სხვადასხვა აქტივობა: ბოჩა , მშვილდით სროლა, ეტლით სპორტული ცეკვა,ასევე აღსანიშნავია ქართული წარმოების ეტლების გამოფენა და ტოტალურად უსინათლო მხატვრის გამოფენა და სხვადასხვა ნამუშევრები შეზღუდული შესაძლებლობების მქონდე პირების მიერ გაკეთებული. კიდევ ერთხელ მინდა დიდი მადლობა მოვუხადო პლატფორმა "ინიციატივას" ჩვენი მასპინძლობისთვის", — განაცხადა პროექტის დირექტორმა, ხათუნა გავაშელმა.

ფოტო: ინიციატივა

"ინიციატივა" ეს არის პლატფორმა, რომლის მიზანია თავად შექმნას, გააერთიანოს და ხელი შეუწყოს საინტერესო ინიციატივას, საქველმოქმედო, შემეცნებითი, გასართობი და განვითარებაზე ორიენტირებული სოციალური პროექტების მიმართულებით. პლატფორმას სამი ძირითადი მიმართულება აქვს: პასუხისმგებლობიანი თამაში — დღეს საზოგადოების და ინდუსტრიის მნიშვნელოვანი გამოწვევაა. აუცილებელია ცნობადობის ამაღლება, რომ თამაში იყოს უსაფრთხო. სპორტი — პლატფორმის მიზანია ქართული სპორტის მხარდაჭერა და მისი პოპულარიზაცია. ადამიანები — ინიციატივის მიზანია სხვადასხვა სოციალური პროექტების განხორციელებით ხელი შეუწყოს, ადამიანებს წინსვლასა და განვითარებაში.

"აქტიური ცხოვრება ჩემი სტიქიას" მიზანია საზოგადოებაში შეზღუდული შესაძლებლობის მქონე პირთა სრულფასოვანი ინტეგრაციის ხელშეწყობა.