ქართული ოცნების აღმასრულებელი მდივანი პარტიის თავმჯდომარის შეურაცხმყოფელი ფრაზების მაკრიტიკებლებს "ბნელი სექტის ნაწილად" მოიხსენიებს.

რატომ არის მნიშვნელოვანი: კობახიძე მთავარი არხის ჟურნალისტს თავს დაესხა — მმართველი პარტიის თავმჯდომარემ მედიის წარმომადგენელს დისკრიმინაციული მოტივით პირადი შეურაცხყოფა მიაყენა და მისი დამცირება ზიზღის ენით სცადა.

  • ის ჟურნალისტს ეუბნება, რომ "პირი მოიწმინდოს", რადგან ყველაფრით დაემსგავსა მის "ბელადს", რომელშიც მიხეილ სააკაშვილს გულისხმობს;
  • კობახიძე აქ არ გაჩერებულა და ჟურნალისტს, რომელიც მას დავით არახამიას შესახებ კითხვას უსვამდა, უთხრა, რომ "პოლიტიკის გამო სახე დაკარგა" და მის მიმართ სექსისტური ფრაზები გამოიყენა.

დეტალები: მდინარაძე ცდილობს წარმოიაჩინოს, რომ ირაკლი კობახიძის გაღიზიანება გამოიწვია კითხვამ "კაგებეს" აგენტის შვილის შესახებ.

  • მისი თქმით, მსგავსი კითხვა არავის არ უნდა დაუსვა — აქ დეპუტატი შეურაცხყოფას აგრძელებს და აცხადებს, რომ ეს "უზრდელობის, უტიფრობის, მავნებლობის და უბინძურესი შეურაცხყოფის გარდა, უდიდესი სიბნელეა ამავდროულად";
  • "და თუ მაინც ასეთის მკადრებელი ხარ, პასუხი არ უნდა გაგიკვირდეს! ვინც მხოლოდ პასუხზე "ბრაზდება", ის "ტრენდს" აყოლილი ბნელი სექტის ნაწილია, რომელიც, საბედნიეროდ, ჩვენი საზოგადოების მცირე ნაწილს წარმოადგენს".

კობახიძის გამართლება მდინარაძემ მანამდეც სცადა — მისი თქმით, რომ ის რომ პოლიტიკოსი არ ყოფილიყო, ჟურნალისტები "გაცილებით მძიმე სიტყვებს დაიმსახურებდნენ".

  • დეპუტატმა საკითხზე კომენტარის გაკეთებისას მედიის წარმომადგენლებს შეურაცხყოფა თავადაც მიაყენა.

კობახიძეს მხარს უჭერს გივი მიქანაძეც, რომელიც მსგავსი აგრესიული საქციელის ფონზე მას აქებს, პატრიოტს და გამორჩეულ ლიდერს უწოდებს და ამაყობს კიდეც მისი ხელმძღვანელობით.

  • მიქანაძე კობახიძის გამართლების მცდელობაც აქვს და ისეთ ნარატივს ატარებს, რომ ჟურნალისტი დამნაშავედ გამოიყვანოს, თითქოს არსებობს კითხვები, რომელიც მედიამ არ უნდა დასვას, რომ მმართველ გუნდში არ გაღიზიანდნენ.

კობახიძის საქციელი დაგმო საქართველოს პრეზიდენტმა, სალომე ზურაბიშვილმა და განაცხადა, რომ " ეს მხოლოდ და მხოლოდ პოლიტიკურ სისუსტეს ამჟღავნებს".

  • ამას გმობს საქართველოს ჟურნალისტური ეთიკის ქარტიაც და აღნიშნავს, რომ აღნიშნავს, რომ მმართველი პარტიის ხელმძღვანელების მხრიდან სრულიად მიუღებელია, როგორც ამგვარი დამოკიდებულება ჟურნალისტისადმი, ისე ასეთი დისკრიმინაციული ლექსიკის გამოყენება.