საქართველოს პრეზიდენტის შვილის, ანა მარგველაშვილის კიდევ ერთი მეგობარი ნარკოდანაშაულის ბრალდებით დღეს, 15 მაისის საღამოს დააკავეს. ამის შესახებ, რუსთავი 2 ავრცელებს ინფორმაციას და წერს, რომ თორნიკე კაჭარავა პოლიციის სამმართველოს შენობაშია გადაყვანილი. ამავე ტელეკომპანიის ცნობით, ჯერჯერობით უცნობია, თუ რომელ ნარკოტიკულ საშუალებაზეა საუბარი.

აღნიშნული პირის დაკავება On.ge-ის შინაგან საქმეთა სამინისტრომ დაუდასტურა. უწყების ცნობით, იგი სისხლის სამართლის კოდექსის 260-ე მუხლის პირველი ნაწილით გათვალისწინებული დანაშაულის ბრალდებით დაიჭირეს, რაც ნარკოტიკული საშუალების, მისი ანალოგის უკანონო დამზადება, წარმოება, შეძენა, შენახვა, გადაზიდვა, გადაგზავნა ან გასაღებას გულისხმობს. დანაშაული ისჯება თავისუფლების აღკვეთით ვადით თერთმეტ წლამდე.

პრეზიდენტის შვილი, ანა მარგველაშვილი, 21 მარტს, გადაცემა არჩევანში აცხადებდა, რომ თორნიკე კაჭარავას ნარკოტიკების ჩადებით ემუქრებოდნენ. მისივე თქმით, კაჭარავა დაჭერის შიშის გამო სახლიდან ვერ გამოდიოდა.