არასამთავრობო ორგანიზაციები მადლობას უხდიან ევროკავშირის ელჩს საქართველოში და ღია წერილით მიმართავენ.

რატომ არის მნიშვნელოვანი: საქართველოში ევროკავშირის ელჩმა, კარლ ჰარცელმა თავისი ოთხწლიანი დიპლომატიური მისია დაასრულა.

  • ქართულ ოცნებაში თქვეს, რომ ჰარცელი უარყოფით როლს ასრულებდა საქართველო-ევროკავშირის ურთიერთობაში.
  • ოპოზიციის ნაწილმა ქართული ოცნების მხრიდან ევროკავშირის ელჩზე თავდასხმა დაგმო.

დეტალები: NGO-ების თქმით, ჰარცელის ელჩობა დაემთხვა ტრაგიკულ და ისტორიულ მოვლენებს, როგორც საქართველოში, ასევე უკრაინაში.

  • "ჩვენ ვაფასებთ და მადლიერები ვართ იმ მხარდაჭერისთვის, რომელსაც ჩვენი სამშობლო ყოველთვის იღებდა საქართველოს მთავარი საგარეოპოლიტიკური მიზნის მისაღწევად";
  • "ჩვენ ვაფასებთ თქვენს ჩართულობას ყველა იმ რეფორმის გატარებაში, რომლებიც დააახლოებენ საქართველოსა და ევროპის კავშირს, და რომელთა ჩატარება აუცილებელია ჩვენი ქვეყნის თითოეული მოქალაქის ცხოვრების გასაუმჯობესებლად";
  • "თქვენ ყველაფერი გააკეთეთ საქართველოს ევროპული მომავლისთვის, საქართველოში ყოფნის დროს უდიდესი პატივისცემითა და მოწიწებით ეკიდებოდით ქართულ კულტურასა";
  • "მადლობა გაწეული სამსახურისა და იმ მხარდაჭერისთვის, რომელიც ჩვენს ქვეყანას, მოქალაქეებსა და სამოქალაქო საზოგადოებას პირადად თქვენგან ჰქონდა".

წერილში ნათქვამია, რომ ბოლო პერიოდში ქართული ოცნების მხრიდან გახშირებული ანტიევროპული და ანტიამერიკული განცხადებები, საქართველოს სტრატეგიული მოკავშირეებისა და მეგობარი ქვეყნების ელჩებზე თავდასხმები.

  • "საგარეო პოლიტიკისა და ქვეყნის ინტერესების შიდაპოლიტიკურ თამაშში გამოყენების მცდელობები აზიანებს ჩვენი ქვეყნის ეროვნულ ინტერესებს და პირდაპირ საფრთხეს უქმნის ჩვენი ქვეყნის მომავალს".
  • "მიუხედავად ამისა, სამოქალაქო საზოგადოება გააგრძელებს ჩვენი ქვეყნის დასავლური მომავლის დაცვას და ყველაფერს გააკეთებს ჩვენი ქვეყნის მთავარი საგარეოპოლიტიკური მიზნის მისაღწევად — დავუბრუნდეთ ევროპული ერების ოჯახს და დავასრულოთ რუსეთის მიერ აფხაზეთისა და ცხინვალის რეგიონის ოკუპაცია".

მიმართვას ხელს 22 ორგანიზაცია აწერს, სრული სია შეგიძლიათ ნახოთ აქ.