უკრაინის პროკურატურამ დაშავებული და დაღუპული ბავშვების შესახებ ინფორმაცია განაახლა. თუმცა მონაცემები საბოლოო არ არის, რადგან დაბომბვის ადგილების შემოწმება აქტიური საომარი მოქმედებების ზონებში და დროებით ოკუპირებულ ტერიტორიებზე ვერ ხერხდება.

რატომ არის მნიშვნელოვანი: პუტინის გაუმართლებელ ომს, რომელიც თითქოსდა დემილიტარიზაციას ემსახურება, მშვიდობიანი მოქალაქეები, მათ შორის, ბავშვებიც ეწირებიან.

  • რუსებმა არაერთხელ დაბომბეს დასახლებები, ევაკუაციის სივრცეები და თავშესაფრები, წარწერით "ბავშვები".
  • ეს კიდევ ერთხელ უსვამს ხაზს ოკუპანტების სისასტიკეს და იმას, რომ პუტინი საკუთარი მიზნების მისაღწევად არაფერს ერიდება.

რიცხვებში: ომის დაწყებიდან დღემდე 358 ბავშვი დაიღუპა, 681-ზე მეტი ბავშვი დაშავდა, მათ შორის:

  • დონეცკის ოლქში — 361;
  • ხარკოვის ოლქში — 194;
  • კიევის ოლქში — 116;
  • ჩერნიგოვის ოლქში — 68.

დეტალები: პროკურატურის ცნობით, 20 ივლისს, ქალაქ ხარკოვში მტრის მასობრივი დაბომბვის შედეგად 13 წლის ბიჭი დაიღუპა, 15 წლის გოგო კი დაშავდა.

  • უწყებაში ამბობენ, რომ დანაშაულებრივი მტკიცებულებების შეგროვების შედეგად დადგინდა, რომ დონეცკის ოლქის ქალაქ მარიუპოლში საცხოვრებელი კვარტლების დაბომბვის შედეგად 24 თებერვლიდან 29 მარტამდე პერიოდში ოთხი ბავშვი დაიღუპა.
  • რუსეთის შეიარაღებული ძალების მიერ დაბომბვის შედეგად 2 185 სასწავლო დაწესებულება დაზიანდა. 221 მთლიანად განადგურდა.

გაეროს განცხადებით, ომი დამანგრეველ გავლენას ახდენს უკრაინის 7,5 მილიონ ბავშვზე.

  • ორგანიზაციის მონაცემებით, უკრაინელ ლტოლვილთა რიცხვი 9 მილიონს გადასცდა, მათგან თითქმის ნახევარი ბავშვია.