ინფორმაცია ამის შესახებ მომღერლის რუსულენოვან ვებგვერდზე გამოქვეყნდა. კონცერტის ბილეთები უკვე სხვადასხვა რუსულ საიტზე იყიდება.

რატომ არის მნიშვნელოვანი: მაშინ, როცა მთელი ცივილიზებული მსოფლიო რუსეთის იზოლაციას ცდილობს და უკრაინას უცხადებს სოლიდარობას, რუსეთში ღონისძიებებში მონაწილეობას, მხოლოდ კრემლის და პუტინის პოლიტიკის მხარდამჭერები იღებენ.

  • მოსკოვში ჩასვლამდე გოგიტიძეს კონცერტები აქვს დაანონსებული ბათუმშიც.

დეტალები: რუსული ვებგვერდების მიხედვით, გოგიტიძის კონცერტზე ბილეთის ფასი 1 500-დან 5 000 რუბლამდეა, რაც დაახლოებით 80-დან 270 ლარამდეა.

  • მოსკოვის ღონისძიებაზე სხვა ინფორმაცია არ იძებნება, თუმცა აღსანიშნია, რომ მანამდე 24 ივლისს მომღერალს აქვს კონცერტი ბათუმში, კლუბ სექტორ 26-ში.
  • მის ფეისბუქგვერდზე კი არაერთი კონცერტის ჩანაწერის ნახვა შეგიძლიათ, რომელსაც საქართველოში მართავს.

გოგიტიძეს 14 ივლისს ფეისბუქზე გამოქვეყნებული აქვს ვიდეო, რომელშიც რუსულად მღერის. ის წერს, რომ იმღერებს ყელა ენაზე, ყველა ქვეყანაში, კუთხესა და კუნჭულში, სადაც საჭიროდ ჩათვლის. მომღერალი ამტკიცებს, რომ ენა და კულტურა ვერასდროს იქნება მტერი:

  • "ჩემი მტერი არის ზუსტად ის პროპაგანდისტული მანქანა რომელიც სათავეებშია და არა ხალხში. ჩვენ გვჯერა ყველასი და ყველაფრის გარდა ღმერთისა და საკუთარი თავისა... ხალხი ყველგან თითქმის ერთნაირია".
  • "მე ძალიან კარგად ვიცი ვის მიერაა ოკუპირებული ჩემი ქვეყანა. სწორედ ამიტომ ვმღერი ზუსტად იქ სადაც ვმღერი".
  • "მე ამ ხმას მივაწვდენ ყველას, ვისაც საჭიროა. თქვენ კი დამაკვირდით. საინტერესო გზაა ძალიან. მანამ სანამ მე ჩემს გზას გავივლი თქვენ აზიარეთ ჩემი პოსტები წერეთ კომენტარები. ვიღაცა მიიღებს მას ვიღაცა ვერა, მაგრამ ერთი დაიმახსოვრეთ: პლასმასის სახლებს აუცილებლად გაადნობს სიმართლის მზე".