1-ელ მარტს უჩა ნანუაშვილმა სახალხო დამცველის ოფისში პრეზენტაცია გამართა და 5 წლამდე ბავშვთა სიკვდილიანობის სტატისტიკასა და მისი პრევენციის გზებზე ისაუბრა.

ომბუდსმენის თქმით, წინა წლებთან შედარებით 5 წლამდე ბავშვთა სიკვდილიანობის მაჩვენებელი მნიშვნელოვნად შემცირდა, თუმცა შემცირების მასშტაბები არ არის დამაკმაყოფილებელი საერთო ევროპულ მაჩვენებელთან მიმართებაში:

"2015 წელს 0-დან 5 წლამდე ასაკის 576 ბავშვი გარდაიცვალა. ბავშვთა სიკვდილიანობის საერთაშორისო ჯგუფის მონაცემებით, განვითარებულ ქვეყნებში ყოველ 1000 ცოცხალ ახალშობილზე სიკვდილიანობის მაჩვენებელი 6 ბავშვს შეადგენს, საქართველოში ეს მაჩვენებელი 12-ს აღწევს".

უჩა ნანუაშვილის თქმით, ასევე მაღალია მშობიარე დედათა სიკვდილიანობის მაჩვენებელი საქართველოში და ის ყოველ 100 ათასზე 36-ს შეადგენს.

სახალხო დამცველმა ჩვილ ბავშვთა სიკვდილიანობის გამომწვევი მიზეზები დაასახელა:

  • სამედიცინო სერვისების გაუმართაობა;
  • ნეონატოლოგების სიმცირე;
  • ორსულთა პატრონაჟის არაადეკვატური სისტემა;
  • სამედიცინო პერსონალის დაბალი კვალიფიკაცია;
  • მშობელთა ცნობიერების დაბალი დონე.

უჩა ნანუაშვილმა საქართველოს რეგიონებში არსებულ ისეთ ხარვეზებზე გააკეთა აქცენტი, როგორიცაა უხარისხო და დაგვიანებული მომსახურება:

"2013 წელს გაეროს ბავშვთა ფონდმა ჩაატარა კვლევა, რომელმაც გამოავლინა, რომ თბილისის ფარგლებს გარეთ მცხოვრები ჩვილ ბავშვთა გარდაცვალების ალბათობა 1,4-ჯერ უფრო მაღალია დედაქალაქთან შედარებით".

სახელმწიფო ვალდებულია დაიცვას ბავშვების სიცოცხლე და ჯანმრთელობა

ომბუდსმენის თქმით, სახალხო დამცველის აპარატმა ზოგადი რეკომენდაციებით საქართველოს მთავრობას უკვე მიმართა. წინადადების მომზადებისას მათ ევროპის 10 ქვეყნის პოლიტიკა და კანონმდებლობა შეისწავლეს.

ეს რეკომენდაციებია:

  • ბავშვთა სამედიცინო დაწესებულებების ხელმისაწვდომობა ნებისმიერი ოჯახისთვის;
  • სისტემის მუშაობის ხარისხის გაუმჯობესება;
  • დაწესებულებების შესაბამისი ინფრასტრუქტურითა და სამედიცინო აპარატურით აღჭურვა;
  • ვერტმფრენის გამოყოფა მაღალმთიანი რეგიონებისთვის;
  • პერსონალის კვალიფიკაციის ამაღლება;
  • ორსულთა პატრონაჟის სისტემის განხორციელება;
  • ჩვილი ბავშვების მკურნალობასთან დაკავშირებით ინფორმაციის ხელმისაწვდომობა;
  • ერთიანი რეგულაციის შემუშავება კერძო და საჯარო სამედიცინო ტრანსპორტის გამოყენებასთან დაკავშირებით;
  • ერთიანი ელექტრონული ბაზის შექმნა, სადაც პაციენტის სამედიცინო ისტორია დამუშავდება და შეინახება.

გაეროს ბავშვის უფლებების კომიტეტის (CRC) რეკომენდაციაში საუბარია დღენაკლული ბავშვების დაბადების შემაშფოთებლად მაღალ მაჩვენებელზე. კომიტეტი საქართველოს მუცლად მყოფი და დღენაკლული ბავშვების ჯანმრთელობის უფლებების დაცვისაკენ მოუწოდებს.