"მიწის საკითხი არის ის, რაც გვაღელვებს ყველას," - აცხადებს საქართველოს პარლამენტის თავმჯდომარე და ამატებს, რომ უცხოელებზე მიწის გაყიდვას საქართველოს ორგანული კანონი დაარეგულირებს. კობახიძემ ამის შესახებ რუსთავში, კონსტიტუციის პროექტის საერთო სახალხო განხილვისას განაცხადა:

"შემუშავებული კონკრეტული პროექტი, რომელიც უზრუნველყოფ იმას, რომ დაცული იყოს ჩვენი ეროვნული სტრატეგიული ინტერესი ამ კუთხით. ძალიან სწორად არის რეგლამენტირებული ის საკითხები, რომლებიც დაკავშირებული მიწების გასხვისებასთან. მათ შორის, პირველ რიგში უცხოელებთან მიმართებით."

პარლამენტის თავმჯდომარის თქმით, აღნიშნული კანონპროექტი უახლოეს მომავალში შევა პარლამენტში განსახილველად.

ორი დღის წინ, 12 მაისს, ირაკლი კობახიძემ თქვა, რომ მიწის უცხოელზე გასხვისებას კონსტიტუცია დაარეგულირებდა. უცხოელებზე მიწის გასხვისების წინააღმდეგ საკონსტიტუციო კომისიის სამუშაო პროცესის დროს გამოდიოდნენ ქართული ოცნების წევრები ბექა ნაცვლიშვილი, კობა ნარჩემაშვილი და ახლა უკვე საკონსტიტუციო სასამართლოს მოსამართლე მანანა კობახიძე.